Ҳожиакбар Ҳайдаровнинг «Дўлана» клипи намойиш этилганидан сўнг аксарият мухлислар уни марҳум отаси Нуриддин Ҳайдаровнинг қўшиғини бузганликда, Ўзбек Миллий академик драма театри актёрларини эса бачкана хатти-ҳаракатларда айблади. «Тасвир» газетаси «Дўлана» клипида суратга тушган актёрлар Эркин Комилов, Теша Мўминов ва Ҳамид Тошпўлатов билан боғланиб, уларнинг фикрлари билан қизиқди, дея маълум қилади «Даракчи.uz».
Эркин Комилов:
— Нуриддинга ҳурматим баланд эди, яқин эдик. Менга сўзлари ҳаммамизга ёд бўлиб кетган «Дўлана» қўшиғини ўғли куйлаётганини айтиб, «Клипида қатнашиб берсангиз» деб илтимос қилишди. «Йўқ» деёлмадим. Ўғлининг: «Дадам сизни яхши кўрарди...» деган гапидан кейин марҳум қадрдонимнинг хотираси учун клипда суратга тушишга рози бўлдим. Съёмкага борганимиздан кейин нотўғри қилганимни тушуниб, афсусландим. Кўнгли бўшлик қилганим учун ўзимдан хафа бўлдим. Менга қўшиқнинг талқини ёқмади, ўзбекона ашула чиқмабди. Суратга тушишдан қайтаётиб, режиссёрга «Биз тушган жойларни қирқиб ташланг...» деб қайта-қайта тайинлаб кетдим.
Теша Мўминов:
— Клипда нима кўрсатилиши, мазмунидан бехабар бордим. Боргандан кейин анча одам тўплангани, тайёргарлик кўрилгани, бунга қанча вақт сарфланганини кўриб, ташлаб кетиш ҳам ноқулай бўлди. Клипда «Ёш санъаткорга руҳий мадад бўлар» деган маънода боргандим. Биз отасининг ўрнини боссин, деган яхши ниятда ёрдам бермоқчи бўлдик. Бунақа енгил-елпи нарса олиши хаёлимизга ҳам келмабди. Тушунганимиздан кейин эса кеч бўлди...
Ҳамид Тошпўлатов:
— Клипда суратга тушиш учун уч-тўртта одам ўртага тушиб, қилган илтимосларига «йўқ» деёлмадим. Клип жараёни ҳақида билгандан кейин устоз санъаткорларнинг олдида ташлаб чиқиб кетиш ҳам ноқулай бўлди. Аммо мен актёрман, ҳеч қандай уят иш қилганим йўқ, вазифамни бажардим.
Изоҳ (0)