«Дарё» интернет-нашрининг Android операцион тизимида ишловчи қурилмалар учун мўлжалланган мобил дастурини AndroidBozor’дан — TAS-IX ҳудудида юқори тезликда ва трафикни йўқотмасдан кўчириб олиш имкони пайдо бўлди.
AndroidBozor — Ўзбекистондаги ҳали жуда ёш, бироқ куч ва ғайратга тўла, ривожланишда давом этаётган стартап-лойиҳа бўлиб, Android операцион тизими учун мўлжалланган мобил дастурларни TAS-IX ҳудудида кўчириб олиш имконини тақдим этади.
AndroidBozor’га жойлаштирилган мобил дастурларнинг бир қисми лойиҳа таъсисчи — Smart Soft Development компанияси томонидан ишлаб чиқилган, қолгани эса бошқа компанияларнинг ишланмаларидир. Баъзи дастурларни кўчириб олиш пуллик бўлса, аксарият мобил дастурлар, хусусан, «Дарё» мобил дастурини бепул юклаб олиш мумкин.
«Дарё»нинг Android учун иловаси Ўзбекистондаги энг оммабоп ОАВ мобил дастури бўлиб, Google Play маълумотига кўра, 100 минг мартадан кўпроқ юклаб олинган, 5 апрель ҳолатига кўра ўзбекистонлик андроидчилар томонидан энг кўп юклаб олинаётган 20 мобил дастурдан бири ҳисобланади.
«Дарё» интернет-нашри ўз мобил дастурларини янада мукаммал кўринишга келтириш устида ишламоқда. Хусусан, дастурнинг сўнгги янгиланишидан сўнг фотогалереялар ва хабарларга илова қилинган фотосуратларни кўриш жараёни қулайлашди, хабарга илова қилинган фотосуратлардан бирини танлаб, хабардаги барча суратларни слайд-шоу шаклида кетма-кет кўриш имконияти қўшилди.
«Дарё»нинг Android операцион тизими учун мўлжалланган мобил дастурини AndroidBozor’дан юклаб олинг ва янгиликлар дарёсидан четда қолманг!
Изоҳ (0)