Янги iPad Pro 9.7’ни таъмирга яроқсиз деб топишди

Apple’нинг янги планшетига iFixit мутахассислари 10 баллдан атиги 2 балл қўйди, деб ёзади «Hi-tech.mail.ru». iPad Pro 9.7’ни таъмирлашдаги асосий муаммолар яхлит бўлиб қўшилиб кетган дисплей ва шиша, шунингдек, кўп миқдордаги елим туфайли юзага келади.

iFixit экспертлари таъкидлашича, Apple «кенжа» версиянинг ички конструкциясини iPad Pro 12.9’га нисбатан анча сезиларли тарзда ўзгартиришга мажбур бўлган. Ўзгаришлар эса таъмирга яроқлилик хусусиятига салбий таъсир ўтказган.

Apple’нинг янги планшети конструкциясида камчиликлар талайгина. Дисплей, шиша ва дигитайзер панели битта бўлиб қўшилиб кетган, кўплаб компонентлар елим билан маҳкамланган, натижада таъмирлаш жараёни қийинлашади, магнитли туйнукчани эса умуман алмаштириб бўлмайди.

iFixit мутахассислари қурилмани деярли таъмирга яроқсиз деб топди, у синиб қолса, сервисга олиб бориш фойдасиз деса ҳам бўлади.