Ўзбекистон Миллий кутубхонасида Ўзбекистон халқ шоири, Ўзбекистон Қаҳрамони Абдулла Орипов таваллудининг 75 йиллигига бағишланган ижодий учрашув бўлиб ўтди. Бу ҳақда Хуршид Давроннинг Facebook’даги саҳифасида хабар берилган.
Ижодий кечада сўзга чиққанлар Абдулла Ориповнинг ҳозирги ўзбек адабиёти ва замонавий таржимашунослик ривожига қўшган ҳиссасини эътироф этиб ўтди. Педагогика фанлари доктори, профессор Қозоқбой Йўлдошев шоир асарларининг миллий руҳиятга таъсири, Ўзбекистон халқ шоири Усмон Азим Абдулла Орипов шеъриятида руҳ озодлиги талқини ҳақида сўзлаган бўлса, Ўзбекистон халқ шоири Хуршид Даврон Абдулла Ориповнинг устозлик хислатларига алоҳида тўхталди.
«Жаҳон адабиёти» журнали бош муҳаррири Шуҳрат Ризаев «Абдулла Ориповнинг таржимонлик фаолияти» мавзусида чиқиш қилди, «Ўзбекистон» нашриёти директори ўринбосари Ашурали Жўраев эса «Абдулла Орипов ижодида публицистик руҳ» мавзусини ёритди.
Учрашув сўнгида Абдулла Орипов ижодий учрашув иштирокчиларига миннатдорлик билдириб, янги шеърларидан ўқиб берди.
Изоҳ (0)