Испанияда автобус иштирокида юз берган ЙТҲ оқибатида 13 киши қурбон бўлди. Шулардан етти нафари италиялик талаба бўлиб, яна уч нафар қиз турли даражадаги шикастланишлар билан шифохонага ётқизилган. Бу ҳақда «ТАСС» хабар беради.
Авария Таррагона (Каталония автоном вилояти) провинциясида 20 март, якшанба куни тонгда юз берган. Ампоста шаҳри яқинида 60 кишини олиб кетаётган автобус машина билан тўқнашиб кетган. Барселонага қараб йўл олган автобус йўлнинг қарама-қарши йўналишига чиқиб кетган ва автомобилга урилган.
Каталония ҳукумати вакили фожиа ҳайдовчининг хатоси туфайли содир бўлганлигини маълум қилган.
Транспорт воситасида Испания, Перу, Болгария, Польша, Украина, Ирландия, Фаластин, Япония, Чехия, Янги Зеландия, Буюк Британия, Италия, Венгрия, Германия, Норвегия, Швеция ва швейцариялик талабалар бўлган. Улар Испанияга «Эрасмус» талабаларни алмашиш дастури бўйича борган.
Изоҳ (0)