17 март куни Самвел Бабаян бош мураббийлигидаги футбол бўйича Ўзбекистон миллий терма жамоаси ЖЧ–2018 иккинчи саралаш босқичи сўнгги икки ўйинидан олдин йиғинга киришди. Аввалроқ эса Самвел Бабаян ЖЧ–2018 Филиппин ва Баҳрайнга қарши ўйинлар учун чақирилган футболчиларнинг кенгайтирилган рўйхатини маълум қилган эди.
Ўзбекистон футбол федерацияси матбуот хизматининг маълум қилишича, ушбу футболчилар рўйхатига киритилган терма жамоанинг икки нафар аъзоси – «Бунёдкор» клубининг ҳужумкор ярим ҳимоячиси Достонбек Ҳамдамов ҳамда «Пахтакор» жамоаси аъзоси Жалолиддин Машарипов соғлиғидаги муаммолар туфайли терма жамоа лагерини тарк этди.
Ҳамдамов даволаниш курсларига эҳтиёжи бор бўлгани сабаб терма жамоа билан машғулотларни тўхтатишига тўғри келди. Унинг ўрнига «Бунёдкор»нинг бошқа бир футболчиси – Акром Комилов терма жамоа машғулотларига жалб этилди. Жалолиддин Машариповнинг терма жамоа машғулотлари давомида жароҳати безовта қилди ва унга ҳам мураббийлар штаби даволаниш учун жавоб берди.
Ўзбекистон миллий терма жамоасининг Жаҳон чемпионати–2018 иккинчи саралаш босқичи доирасидаги сўнгги икки ўйини Тошкентдаги «Бунёдкор» стадионида ўтказилади. Ўзбекистон миллий терма жамоасининг 24 март куни Филиппинга қарши ҳамда 29 март куни Баҳрайнга қарши бўладиган ўйинлари 18:00 да старт олади.
Эслатиб ўтамиз, сўнгги икки ўйин олдидан Ўзбекистон терма жамоаси олти учрашув ўтказиб, 15 очко тўплаган ҳолда «H» гуруҳида иккинчи ўринни эгаллаб турибди. Гуруҳда ҳозирча 7 учрашувда 16 очко жамғарган КХДР терма жамоаси пешқадамлик қилмоқда.
Изоҳ (0)