Бугун,

  • USD 10940.05
  • RUB 182.26
  • EUR 11121.65

Бу йил Ўзбекистонда қиш нисбатан илиқ келди, январь ва февраль ойлари давомида мамлакатнинг қатор ҳудудларида ҳаво ҳароратининг илиқлиги бўйича қарийб 50—100 йиллик рекордлар янгиланди, қиш зийнати ҳисобланган қорнинг ёғиши эса деярли кузатилмади.

Мартнинг дастлабки кунлари январь ва февралга нисбатан салқинроқ бўлмоқда, қарийб бир ҳафтадан бери ёғингарчилик тингани йўқ, хусусан, куни кеча Самарқандда ҳатто қор ёғди. Нима бўлганда ҳам, ҳар фасл ўз ўрнида, қиш эса қори билан бўлгани маъқул.

«Бу йил қишда қорни деярли кўрмадик», деб ўкинишга ҳожат йўқ. «Дарё» муштарийси қорли Альп тоғларидан фоторепортаж уюштирди. Кўринг, қордан завқланинг!

Саслонг чўққиси

Фото: «Дарё»

Фото: «Дарё»
Машҳур Саслонг чўққиси Италия ҳудудида жойлашган. Доломити Альпи деб номланувчи ҳудудда жойлашган чўққи ёнида тоғ чанғи спорти бўйича жаҳон кубоги босқичлари ўтказилади. Ҳудудда 481 та дор йўли ва тоғ чанғиси билан шуғулланишга мўлжалланган умумий узунлиги 1,2 минг километрга тенг трассалар мавжуд. Эътиборли томони, бу дор йўллари ва чанғи трассаларининг барчасидан ягона чипта орқали фойдаланиш мумкин.

Ўрмон сукунати

Фото: «Дарё»

Фото: «Дарё»
Италия ҳудудидаги манзараси бетакрор ўрмоннинг сукунатни чанғичиларнинг кулгуси ва ҳайқириқларигина бузади.

Маттерхорн чўққиси

Фото: «Дарё»

Фото: «Дарё»
Швейцариянинг энг баланд нуқтаси — баландлиги 4478 метрга тенг Маттерхорн чўққиси ўзининг мафтункор шакли билан кишини ҳайратга солади. Машҳур Toblerone шоколадларида айнан шу чўққи акс этган.

Тажрибали чанғичилар йўли

Фото: «Дарё»

Фото: «Дарё»
Альпдаги энг тик тоғ чанғи йўллари қора ранг билан алоҳида белгиланади. Хусусан, Италиянинг Валь Гардена ҳудудида жойлашган бундай трассалардан энг тажрибали чанғичиларгина туша олади.

Эгюий-дю-Миди чўққиси

Фото: «Дарё»

Фото: «Дарё»
Франциянинг Шамони Монблан ҳудудида 65 кишини бирдан Эгюий-дю-Миди чўққисига олиб чиқа оладиган дор йўли бор. Йўл бўйлаб ҳаракатланувчи махсус транспортга 1035 метр баландликда жойлашган бекатдан чиқиб, 2,8 минг метр баландликни атиги 20 дақиқада босиб ўтасиз ва чўққига — денгиз сатҳидан 3842 метрга кўтариласиз. Эгюий-дю-Миди ўзининг 360 даражали панорама майдончаси, тубсиз жарлик устига ўрнатилган тўлиқ ойнаванд «Тубликка бир қадам» аттраксиони ва бетакрор Монблан чўққисини томоша қилиш имкониятини тақдим этиши билан ҳам машҳур.

2 еврога вертолётли тез ёрдам

Фото: «Дарё»

Фото: «Дарё»
Қор билан қопланган тоғ ён-бағирлари билан шаҳардаги теп-текис йўл ўртасида, турган гапки, катта фарқ бор. Умрида шаҳардан ташқарига чиқмаган киши илк бор қорли тоғга чиққанида, эҳтиётсизлик сабаб, бирор кор-ҳолга йўлиқиши мумкинлиги эҳтимолини рад этиб бўлмайди. Мана шундай ҳолатларда Альп тоғларида вертолётлар ёрдамга ошиқади. Бундай «тез ёрдам» жуда қиммат ва фақат бадавлат меҳмонлар учун бўлса керак, дейсизми? Асло! Кунига 2 евролик суғурта тўловини амалга оширсангиз кифоя, бехавотир чанғи учаверсангиз бўлади.

Мафтункор тоғлар, гўзал осмон

Фото: «Дарё»

Фото: «Дарё»
Италиянинг Брей-Червиния тоғ ён-бағирлари ҳайратланарли даражада гўзал. Мафтункорлик масаласида осмон ҳам тоғлар билан рақобатлаша олади.

Чанғичилар йўлини текисловчилар

Фото: «Дарё»

Фото: «Дарё»
Минглаб чанғичиларга хизмат кўрсатадиган трассалар ҳар куни махсус машиналар — ратраклар ёрдамида текисланади. Суратда Австриянинг Майрхофен ҳудудидаги чанғи йўлида ишлаётган ратракларни кўриш мумкин.

Альпдаги осуда қишлоқ

Фото: «Дарё»

Фото: «Дарё»
Австриянинг Финкенберг ҳудудидаги осуда тоғ қишлоғи. Суратдаги бежирим иморатларнинг қарийб барчаси Альп услубидаги меҳмонхоналардир.

Юнгфрау чўққиси

Фото: «Дарё»

Фото: «Дарё»

Швейцарияда жойлашган Европадаги энг баланд темирйўл 3453 метрлик Юнгфрау чўққисига олиб чиқади. Бу темирйўлнинг одатий икки релсидан ташқари, учинчи — тишли релси ҳам бор. 9 километрлик темирйўлнинг 7 километри қоя ичидаги тоннелдан ўтади. Чўққида эса Сизни тўрт томонида тенги йўқ манзара, Эйгер музлигининг ичига ўйиб ишланган Аёз музейи, кинотеатр ва ресторанлар кутиб олади.

Изоҳ
Асосий янгиликлар