Facebook’даги «Водители Ташкента» гуруҳида 15 март, сешанба куни Тошкент йўлларидан бирида тўкилиб кетган буханка нонлар сурати эълон қилинди. «Изоҳга ҳожат йўқ ёки Тошкент — нон шаҳри», деган изоҳ билан суратни жойлаштирган фойдаланувчи бошқа фойдаланувчиларнинг танқиди остида қолди.
Суратда Тошкентнинг номи маълум қилинган чорраҳаларидан бирида нон ташувчи Damas’дан буханкалар тўкилиб кетгани, бир киши нонларни йиғиб олишга уринаётгани тасвирланган. Фотосурат нон тўкилган чорраҳадан ўтиб кетаётган автомобилдан туриб олинган.
Фотохабар остидаги биринчи комментдаёқ сурат муаллифи танқид остига олинган: «Суратга олиш ўрнига, ёрдам бериш керак эди! Бу нон-ку, ахир!». Ушбу мақола ёзилаётган вақтда бу комментга 46 та лайк қўйилган эди.
Бундан бошқа фойдаланувчилар ҳам бу вазиятда автомобилдан тушиб, жабрланувчига ёрдам бериш мақбул иш экани ҳақидаги фикрларини баъзи ўринларда мулойим тарзда, вақти келса ғазаб билан ифода қилган.
Баъзи фойдаланувчилар фотосурат муаллифини салбий руҳдаги комментлар оқимидан сақлашга уринган. «Сурат муаллифи бу сурати билан кимнингдир устидан кулмоқчи бўлмаган, балки нон ташишда санитария талабларига риоя этиш кераклигига чақирмоқчи бўлган бўлса кера», — деб ёзган бир фойдаланувчининг комменти 16 марта лайк қилинган.
Орадан маълум вақт ўтиб, муҳокамага сурат муаллифи ҳам қўшилиб: «Эҳтиёт қилса, [nonlar] тўкилмас эди», — деб фикр билдирган. «Шу тўкилган нонларни кимдир сотиб олиб истеъмол қилади, микробланган бўлса, касаллик орттириб олиши ҳеч гап эмас», — дея қўшимча қилган сурат муаллифи.
Изоҳ (0)