Facebook’dagi “Voditeli Tashkenta” guruhida 15-mart, seshanba kuni Toshkent yo‘llaridan birida to‘kilib ketgan buxanka nonlar surati e’lon qilindi. “Izohga hojat yo‘q yoki Toshkent — non shahri”, degan izoh bilan suratni joylashtirgan foydalanuvchi boshqa foydalanuvchilarning tanqidi ostida qoldi.
Suratda Toshkentning nomi ma’lum qilingan chorrahalaridan birida non tashuvchi Damas’dan buxankalar to‘kilib ketgani, bir kishi nonlarni yig‘ib olishga urinayotgani tasvirlangan. Fotosurat non to‘kilgan chorrahadan o‘tib ketayotgan avtomobildan turib olingan.
Fotoxabar ostidagi birinchi kommentdayoq surat muallifi tanqid ostiga olingan: “Suratga olish o‘rniga, yordam berish kerak edi! Bu non-ku, axir!”. Ushbu maqola yozilayotgan vaqtda bu kommentga 46 ta layk qo‘yilgan edi.
Bundan boshqa foydalanuvchilar ham bu vaziyatda avtomobildan tushib, jabrlanuvchiga yordam berish maqbul ish ekani haqidagi fikrlarini ba’zi o‘rinlarda muloyim tarzda, vaqti kelsa g‘azab bilan ifoda qilgan.
Ba’zi foydalanuvchilar fotosurat muallifini salbiy ruhdagi kommentlar oqimidan saqlashga uringan. “Surat muallifi bu surati bilan kimningdir ustidan kulmoqchi bo‘lmagan, balki non tashishda sanitariya talablariga rioya etish kerakligiga chaqirmoqchi bo‘lgan bo‘lsa kera”, — deb yozgan bir foydalanuvchining kommenti 16 marta layk qilingan.
Oradan ma’lum vaqt o‘tib, muhokamaga surat muallifi ham qo‘shilib: “Ehtiyot qilsa, [nonlar] to‘kilmas edi”, — deb fikr bildirgan. “Shu to‘kilgan nonlarni kimdir sotib olib iste’mol qiladi, mikroblangan bo‘lsa, kasallik orttirib olishi hech gap emas”, — deya qo‘shimcha qilgan surat muallifi.
Izoh (0)