Ўтган қиш Ўзбекистондаги метеорологик кузатувлар тарихидаги энг илиғи бўлди. Бу ҳақда, «Ўзгидромет» маълумотига асосланиб, «Газета.uz» хабар берди.
Хабар беришларича, ҳаво ҳарорати ушбу фаслнинг меъёрдаги кўрсаткичларидан Цельсий бўйича 4,2 даражага баландроқ бўлган.
Мамлакат ҳудудида узоқ муддат сақланган, айниқса февралда яққол сезилган илиқ ва қуруқ об-ҳаво жанубдан — Эрон ҳудудидан илиқ ва қуруқ ҳавонинг интенсив тарзда кириб келиши билан изоҳланади. Қишнинг охирги ойида ҳаво ҳарорати меъёридан 5,6 даража юқорироқ бўлди.
Сўнгги 15 йил давомида февралнинг илиқ келиши тез-тез кузатилмоқда — Тошкентда ҳар уч февралнинг иккитасида ўртача ойлик ҳарорат меъёрдан 3—4 даража ошади, 2004- ва 2006 йилларда ва жорий йилда эса бу кўрсаткич 5 даражага тенг бўлди.
Март ойининг бошида Ўзбекистонда қуруқ ва жуда илиқ об-ҳаво ҳукм сурмоқда. Ҳаво ҳарорати кечаси +7...+12 даражага, кундузи — +20...+25 даражага етмоқда. 6—8 март кунлари баъзи жойларда ҳарорат +27 даражагача кўтарилиши мумкин.
«Ўзбекистонда баҳорнинг бошланиши беқарор об-ҳаво ва ҳароратнинг сезиларли ўзгарувчанлиги билан ажралиб туради. Ёғингарчиликлар ёмғир шаклида кузатилади, аммо мартда бир-икки марта қор ёғиши деярли ҳар йили бўлади. Бу республика ҳудудининг иқлимий ўзига хосликлари билан изоҳланади», — деди Ўзгидромет вакили.
Мартда мўътадил кенгликлар фронтал зонаси ҳали анча фаол бўлиб, у орқали Ўзбекистон ҳудудига Россиянинг Европа қисмидан, кам ҳолларда Уралдан, баъзан ҳатто Ғарбий Сибирдан совуқ ҳаво кириб келади. Шу билан бирга, мартда баҳорги кескин исиш билан боғлиқ бўлган жанубий жараёнлар фаоллашади. Март ойида одатда ҳаво ҳарорати кечаси -3…+2 дан +5…+10 гача, эрталаб +5…+10 дан +20…+25 гача ўзгариб туради. Энг илиқ келган йилларда ҳаво эрталаб +33…+35 даражагача кўтарилган. Мартдаги ҳароратнинг мутлақ максимуми +32,5 даража бўлиб, 1971 йилнинг 16 мартида қайд қилинган.
Март ҳаво шароитларига кўра қай даражада қийин келиши мумкинлигига ўтган йил яққол мисол бўла олади. 2015 йил марти охирида республика ҳудудига кутилмаганда Уралдан ўта совуқ ҳаво оқими кириб келди. 29—31 март кунлари Ўзбекистоннинг кўп қисмида асосан қор шаклида ёғингарчилик кузатилди. Иқлим кескин тушиб кетди, ҳаво ҳарорати кечаси -2…-7, баъзи жойларда -8…-10 гача, эрталаб эса 0 даражани ташкил қилди. Бу сўнгги 50 йилдаги энг совуқ март ойи охири бўлди. 30—31 мартда мамлакатнинг кўп қисмида шу давр учун кузатилган мутлақ совуқ ҳарорат минимуми янгиланди. 31 мартда Тошкентда об-ҳаво бутун кузатувлар тарихидаги ҳарорат минимумидан 4,5 даражага совуқроқ бўлди.
Изоҳ (0)