Бастакор Эннио Морриконе Голливуднинг шон-шараф хиёбонида ўз юлдузига эга бўлди

Голливуд шон-шараф хиёбонида италиялик бастакор Эннио Морриконе номи туширилган юлдуз пайдо бўлди. «ТАСС»нинг ёзишича, шу йўл билан унинг кино санъатига қўшган ҳиссаси эътироф этилди – 1960 йилдан буён машҳур мусиқачи 450 дан ортиқ фильмга мусиқа басталаб берган.

Квентин Тарантинонинг «Жирканч саккизлик» номли охирги фильмига басталаган мусиқаси учун Морриконе «Оскар» мукофотига номзод қилиб кўрсатилди.

Морриконе шахсий юлдузининг очилиш маросими 26 февраль, жума куни Лос-Анжелесда бўлиб ўтди.

«Бундай шараф менинг улушимга тушади деб ҳеч қачон кафолат бера олмаган бўлардим. Мен юлдузга эга бўламан деб кутмагандим», – деб тан олди италиялик маэстро.

Уни қутлаш учун тантанали маросимга Квентин Тарантино ҳамда The Weinstein Company киностудияси асосчиларидан бири Харви Вайнштейн ташриф буюрди.

Голливуд шон-шараф хиёбони Лос-Анжелеснинг шимоли-шарқида жойлашган. Ундаги биринчи юлдуз 1958 йилнинг 15 августида актёр Престон Фостер шарафига ўрнатилган. Аммо хиёбон расман 1960 йилнинг 23 ноябрида очилган. Ҳозирда у ерда 2574 кино соҳаси вакили шарафига юлдузлар ўрнатилган.