Футзал бўйича Осиё чемпионати «А» гуруҳи сўнгги тури доирасида Ўзбекистон ва Ливан (2:0) терма жамоалари ўртасида кечган учрашувдан сўнг Ўзбекистон терма жамоаси бош мураббийи Хосе Мария Мендез матбуот анжуманида иштирок этди, деб хабар қилади «Uff.uz».
- Биз бугун қайсидир терма жамоа — Қирғизистон, Ливан ёки Саудия Арабистони эмас, балки фақат мухлислар учун ўйнадик. Назарий жиҳатдан олиб қараганда, бугунги ўйин натижаси мутлақо аҳамиятсиз эди. Шунингдек, сариқ карточкаси бор бўлган Ирсалиевнинг кейинги ўйинда иштирок эта олмай қолмаслиги учун чора-тадбирлар қўлладик. Яна тўрт футзалчимиз кеча шамоллаб қолган эди. Улар бу ўйинга тайёр ҳолда келишди ва бундан беҳад мамнунман.
Бугунги ўйинни жуда яхши ўтказдик. Шу билан бирга Ливанга ҳам қойил қолиш керак. Рақиб иккинчи бўлимда ўйинини кучайтира олди. Бизнинг жисмоний тайёргарлигимиз яхши эмаслиги бу ўйинда кўриниб қолди. Мен яна Рустам Умаровнинг ўйинини алоҳида таъкидлаб ўтмоқчиман. У Осиёнинг энг яхши посбонларидан бири эканини исботлади. Бизни энди мусобақанинг энг муҳим ўйини кутиб турибди. Чорак финалда ғалаба қозонишимиз шарт.
- Жамоангиз бир кун дам олиши мумкин. Бу кундан қандай фойдаланмоқчисиз?- Биз аввало касал бўлиб қолган футзалчиларни оёққа турғазишга ҳаракат қилишимиз керак. Улар сафга қайтса, муаммоларимиз камаяди. Шунингдек, тумов касаллиги жамоадаги бошқа ўйинчиларга ўтиб кетмаслиги учун эҳтиёт чораларини кўришимиз керак.
- Эрон ва Ироқ ўртасида кечган учрашувда ироқликлар йўл қўйган хатоларни ўрганиб чиқасизми?- Ироқ терма жамоаси Эронга қарши ўтказган ўйинига у қадар эътибор қаратмаган бўлардим. Чунки бу ўйин бизга кўп нарса бермаслиги аниқ. Аслида ҳар қандай жамоанинг Эронга қарши ўтказадиган ўйини ҳеч қандай аҳамият касб этмаслиги аниқ. Чунки Эрон мутлақо бошқача савияга эга жамоа. Бу жамоа бошқа даражада ўйнайди.
Изоҳ (0)