Футзал. Ўзбекистон ОЧ чорак финалида Ироққа қарши ўйнайди

Футзал бўйича Осиё чемпионати, «B» гуруҳи учинчи тури доирасида Эрон терма жамоаси Ироққа қарши майдонга тушди ва ўта йирик ҳисобда ғалабага эришди, деб хабар беради «Uff.uz».

Учрашувнинг биринчи бўлимидаёқ 10:1 ҳисоби қайд этилди. Иккинчи бўлимда эронликлар рақиб дарвозасига яна 3 та гол уришга муваффақ бўлди. Ироқ эса битта гол билан жавоб берди, якуний натижа 13:2. Шу тариқа «B» гуруҳида Эрон терма жамоаси 9 очко билан биринчи ўринни эгаллади, Ироқ терма жамоаси эса 6 очко билан иккинчи ўринда қолди.

Ушбу натижадан сўнг Ўзбекистон футзал терма жамоасининг чорак финалдаги рақиби маълум бўлди. Ўзбекистон муддатидан аввал «А» гуруҳида ғолибликни қўлга киритган эди. Чорак финалда Ўзбекистон терма жамоаси Ироқ билан куч синашадиган бўлди.

«B» гуруҳи ғолиби Эрон терма жамоасининг чорак финалдаги рақиби эса «А» гуруҳи ўйинлари якунига етгач маълум бўлади.