Яқинда Чак Норрис ташаббуси билан Халқаро жанг санъати федерацияси версиясига кўра карате бўйича ўтказилган жаҳон чемпионатларидан бирида машҳур актёр ва жанг санъати устаси ўзбек спортчилари ҳақида фикр билдирди, деб ёзади «Uz24».
Лас-Вегасдаги жаҳон чемпионатида сўзлаган нутқида Чак Норрис Ўзбекистон терма жамоасини юқори баҳолади.
«Улар — катта оиламизнинг аъзолари, улар 15 минг километр йўл босиб келди. Ўтган йиллардаги каби яна ажойиб моҳирликни кўрсатишларига ишонаман. Бироқ менинг дўстларим ҳурмат ва эҳтиромга фақат бу билангина сазовор бўлган эмас. Мен уларни татамидаги жанглардан бошқа пайтларда ҳам азалдан кузатиб бораман. Ҳаттоки кўчада ҳам улар доим шошиб юрадиган ўткинчиларга одоб билан йўл бериб, катта оломон ичида ҳам ажралиб туради. Меҳмонхонада оқсоч ходималардан ўзбекистонлик йигитларнинг хулқи ҳақида сўраганимда, улар тўшаклар доим йиғилган, буюмлар тартиб билан тахланган ва жойлаштирилган, хоналар доим озода туришини айтади», — деди Чак Норрис.
«Майда нарса бўлиб кўриниши мумкин, аммо ушбу спорт тури фалсафасининг моҳияти айнан шу деталларда — одамларга, уларнинг меҳнатига ҳурмат билан муносабатда бўлишда. Ишончим комил, олис республикадан келган меҳмонлар катталарга ҳурмат, кичикларга иззатда бўлиб, кучсизларни ҳимоя қилади. Бу шунчаки кўр-кўрона эмас. Бундай ҳаётий ёндашув ўзбекистонликларнинг қонида бор. Улар ўз мамлакати ва халқига муносиблик билан вакиллик қилади», — дея таъкидлади спорт устаси.
Изоҳ (0)