Футзал бўйича Осиё чемпионати гуруҳ босқичи ўйинлари доирасидаги Ўзбекистон ва Саудия Арабистони терма жамоалари ўртасидаги учрашувдан сўнг Ўзбекистон бош мураббийи Хосе Мария Мендез ўйин ҳақида ўз фикрларини билдириб ўтди. Бу ҳақда Ўзбекистон футбол федерацияси матбуот хизмати хабар бермоқда.
«Бугун фақат якуний натижадан қониқдим. Тан олиш керак, 25 дақиқа давомида Саудия Арабистони биздан кучлироқ ўйин кўрсатди. Биринчи бўлимда рақиб имкониятлардан фойдаланганида ҳисоб бутунлай бошқача бўлиши мумкин эди. Ўйин аввалида йигитлар ўзларига ўхшамади. Иккинчи бўлимда ҳам яхши ўйнамадик, аммо нисбатан тартибли ўйин кўрсатганимиз эвазига якунда ғалабага эришдик. Тўпни назорат қилишда муаммоларга дуч келдик. Турнирда ижобий натижага эришишни истасак, ўз ўйинимизни яхшилаб боришимиз керак.
Ўз уйимизда ўйнаётганимиз учун масъулиятнинг катталиги туфайли ўзимиз хоҳлагандек ўйнай олмагандирмиз, балки. Учрашув бошланиши олдидан тезкор гол уриб, ҳисобда олдинга чиқиб олишимизни таъкидлагандим. Бу ишни фақат иккинчи бўлимда амалга ошира олдик, холос. Қисқа қилиб айтгада, бугун ёмон ўйнадик.
Бугун ишқибозлар зални тўлдиришди. Бу ёқимли. Ҳар қандай ҳолатда ўйингоҳ трибуналари тўла бўлишини истардим. Бу ҳолат бизга ижобий таъсир кўрсатиши керак. Кейинги ўйин Қирғизистон билан. Уларга қарши жуда кўп марта ўйнаганмиз. 2014 йилда Вьетнамдаги Осиё чемпионатида 2:2 ҳисобида дуранг қайд этилган. Қирғизистон жиддий рақиб, уларга қарши ўйинда бугунгига нисбатан яхшироқ ўйнашимиз керак.
Гол ҳисобга олинмаган вазиятда бутун стадионга қараб мен ҳам гол деб ўйладим. Ёнимда ўтирган футзалчи ҳам гол бўлганини таъкидлади. Танаффусда такрорий лавҳа орқали гол бўлганини кўрдик. Шу вазият ҳал қилувчи аҳамият касб этмаганидан хурсандман», — дейди Хосе Мария Мендез.
Эслатиб ўтамиз, футзал бўйича Осиё чемпионатининг 1-турида Ўзбекистон Саудия Арабистонини 5:2 ҳисобида мағлубиятга учратди.
Изоҳ (0)