Футзал бўйича Ўзбекистон миллий терма жамоаси мураббийлар штабида хорижлик мутахассислар иш бошлади. Энди қитъа биринчилиги якунига қадар испаниялик Аркаит Сисниега Гомес фитнесс мураббий, бразилиялик Анҳолето Александре эса физиотерапевт сифатида иш олиб боради. Бу ҳақда Ўзбекистон футзал уюшмаси матбуот хизмати хабар бермоқда.
Аркаит Сисниега Гомес 2013 йилда Испаниянинг «Дебабрена» клубида фитнесс мураббий сифатида иш олиб борган, 2014 йилда эса «Кустом» клубида биомеханика бўйича мутахассис сифатида фаолият юритган.
Анҳолето Александре 2013—2015 йилларда «Нагоя Оушенс» футзал клубида, 2015 йил эса «Чонбури» футзал клубида физиотерапевт лавозимида ишлаган.
Ҳар икки мутахассис билан Осиё чемпионати якунига қадар шартнома тузилган, агар Ўзбекистон терма жамоаси Колумбияда ўтадиган Жаҳон чемпионатига йўлланмани қўлга киритса, улар билан тузилган шартнома муддати узайтирилади.
Ўзбекистон терма жамоаси 10—21 февраль кунлари бўлиб ўтадиган Осиё чемпионатида Ливан, Қирғизистон ва Саудия Арабистони терма жамоалари билан бирга «А» гуруҳида кураш олиб боради. Турнирда дастлабки беш ўринни эгаллаган терма жамоалар шу йили Колумбияда бўлиб ўтадиган жаҳон чемпионатига йўлланма олади.
Ўйинлар Тошкентдаги «Ўзбекистон» ҳамда «Универсал» спорт мажмуаларида бўлиб ўтади. Ўзбекистон футзал уюшмасининг «Дарё»га маълум қилишича, ўйинларга кириш бепул.
Изоҳ (0)