«Матч ТВ» шарҳловчиси Геннадий Орлов ярим ҳимоячи Роман Широков ҳақида фикр билдираркан, россиялик футболчиларга Европада қизиқиш қолмаганини айтиб ўтди. Бу ҳақда «Uff.uz» хабар бермоқда.
«Широков эркин агент мақомида юрибди, аммо у бирор жойда ўйнаши осон эмас. Чунки унинг табиати анча мураккаб ва ҳар бир мураббий уни таклиф этиш олдидан буни ўйлаб кўради. Боз устига қайси клуб у талаб қилганчалик катта пул бериши мумкин?
Широков тезроқ бирор клуб топиши керак. Аммо унга ким таклиф билан чиқаркин? Хориж клубларими? Ким у билан қизиқади? Кокорин ‘Арсенал’га ўтиши ҳақида бир ой тўхтамай гапиришди, аммо лондонликлар пинагини ҳам бузгани йўқ.
Ҳозир вазият шундайки, россиялик футболчиларга Европадан мутлақо қизиқиш йўқ. Ҳатто ‘Лацио’ қизиқиш билдираётган Виталий Денисов ҳам россиялик эмас, балки Ўзбекистон терма жамоаси футболчиси», — дейди Орлов.
Олдинроқ Ўзбекистон термаси ҳимоячиси Виталий Денисов борасида «Лацио» Москванинг «Локомотив» клуби билан музокара бошлагани хабар қилинган эди.
Изоҳ (0)