The Times: АҚШ Сурияда ҳарбий аэродром қуришга киришди
Америкалик ҳарбийлар Сурия ва Туркия чегараси яқинида олдин қишлоқ хўжалиги авиацияси эҳтиёжлари учун фойдаланилган аэродромни қайта қуришга киришди. Бу ҳақда The Times манбаларига таяниб, «РБК» хабар бермоқда.
Суриялик курдлар фаоли Абу Хаскавийнинг айтишича, аэродромда қўмондонлик маркази ва ҳарбий вертолётлар учун майдон пайдо бўлган.
Бағдоддаги АҚШ гуруҳи вакили полковник Стив Уоррен ҳарбийлар аэродромда айнан нима билан шуғулланаётганига изоҳ беришдан бош тортди. Унинг билдиришича, Сурияда махсус бўлинмалар ҳарбийларининг сони кўп бўлмаган гуруҳи фаолият олиб бормоқда, уларга юклатилган вазифалар ошкор этилмаган.
АҚШ разведкасидаги манбаларнинг маълум қилишича, аэродромдан 50 километр ғарбда россиялик ҳарбийлар фаоллашгани кузатилган. Тахминларга кўра, улар Туркиянинг эҳтимолий ҳарбий операциясидан (жумладан, суриялик курдларга қарши) ҳимояланиш истеҳкомларини қуриш мақсадида ҳудудни ўрганмоқда.
