Самвел Бабаян бош мураббийлигидаги Ўзбекистон олимпия терма жамоаси U-23 ёшлар ўртасидаги Осиё чемпионатидан олдинги сўнгги тайёргарлик босқичини ўтказиш учун БААнинг Дубай шаҳрига учиб кетди. Бу ҳақда Ўзбекистон футбол федерацияси 2 январь куни маълум қилди.
Эслатиб ўтамиз, Ўзбекистон олимпия терма жамоаси 12 январь куни Қатарда старт оладиган Осиё чемпионати финал босқичи «C» гуруҳида Жанубий Корея, Ироқ ҳамда Яман U-23 терма жамоаларига қарши майдонга тушади.
Дубай шаҳридаги йиғин Ўзбекистон U-23 терма жамоаси учун Осиё чемпионатидан олдинги сўнгги тайёргарлик босқичи вазифасини ўтайди. Дубайдаги йиғин якунлангач Ўзбекистон U-23 терма жамоаси Қатар пойтахти Доҳа шаҳрига йўл олади.
Ўзбекистон U-23 терма жамоаси Осиё чемпионати баҳсларини 13 январь куни Жанубий Корея олимпия терма жамоасига қарши ўйин билан бошлайди. Ўзбекистон олимпия терма жамоаси гуруҳ босқичидаги иккинчи ўйинини 16 январь куни Ироқ олимпия терма жамоасига қарши ўтказса, сўнгги турда Самвел Бабаян бош мураббийлигидаги терма жамоа Яманга қарши майдонга тушади.
Таъкидлаш жоиз, ушбу Осиё чемпионати Рио-де-Жанейрода бўлиб ўтадиган ёзги олимпиада ўйинларига йўлланма берувчи турнир ҳисобланиб, Осиё чемпионатида дастлабки учта ўринни қўлга киритган жамоалар олимпиадага йўлланмани қўлга киритади.
Олдинроқ мазкур ОЧда иштирок этадиган Ўзбекистон олимпия термасининг таркиби эълон қилинганди.
Изоҳ (0)