Агар АҚШ Эронга қарши янги санкциялар киритса, у парвоз масофаси 5000 километрдан ортиқ бўлган ракеталар ишлаб чиқади. Бу ҳақда мамлакатдаги раҳбар органлардан бири — Қабул қилинаётган қарорларнинг мақсадга мувофиқлиги бўйича кенгаш котиби Муҳсин Ризоийнинг Эрон президенти Ҳасан Руҳонийга йўллаган мактубида айтилади, деб ёзади «ТАСС».
«Эрон ўз ядро дастури бўйича музокараларда келишувга эришиш ва Эроннинг уранни бойитишга бўлган қонуний ҳуқуқини эътироф эттириш учун минглаб центрифугаларини қурбон қилди. Бироқ АҚШ Эронга нисбатан янги санкциялар жорий қилиб, Ислом Республикасига тарсаки билан жавоб қилди. Умид қиламанки, сизнинг кўмагингиз билан тез орада Эрон ракеталари 5 минг километрдан кўпроқ масофага парвоз қилади», — дейилади Ризоийнинг хатида.
30 декабрь куни The Wall Street Journal Вашингтон тез орада Эрон, БАА ва Гонконгда Эрон ракета дастури учун масъул тузилмаларга алоқадорликда гумон қилинаётган камида ўн нафар жисмоний ва юридик шахсларга нисбатан санкциялар киритиш ниятида эканлигини маълум қилган эди.
Изоҳ (0)