Жорж Хотц 2007 йили, 17 ёшида Apple’нинг фақат AT&T билан шартнома асосида сотилган биринчи смартфонини исталган бошқа тармоқда ҳам ишлашга мажбур этганидан сўнг танилганди. 2010 йили у PlayStation 3 қурилмасига бузиб кириш йўлини топди, хакерлик жонига текканида эса сунъий интеллект билан қизиқиб қолди, дея ҳикоя қилади Meduza.
Бу соҳадаги энг замонавий тадқиқотларни ортиқча қийинчиликсиз ўзлаштирган Хотц ҳайдовчисиз автомобиль яратишга қарор қилди. Бунинг учун шахсий автомобили — Acura ILX тажриба модели бўлиб хизмат қилди. Октябрда Хотц навбатдаги иш жойидан бўшаб, Honda автосалонига ишга кирди. Шу тариқа «Акура»нинг барча ҳужжатлари билан танишиш имконига эга бўлди. Машинани турли сенсор ва электроника билан тўлдириб ташлади: бардачокка компьютерни жойлади, узатиш қутиси ўрнига жойстик, марказий панелга эса 21,5 дюймли экран ўрнатди. Буларнинг барчаси учун 50 минг доллар сарфлади, бундан 30 минг автомобиль харид қилишга кетди.
Орадан бир ой ўтгандан сўнг Хотц такомиллаштирилган автомобилни Bloomberg журналистларига намойиш этди. Бу пайтга келиб Жорж бир неча камералар, GPS қабул қилгичлар, радар ва скотч ёрдамида машинанинг марказий тармоқларига уланишга муваффақ бўлди ва уни йўлларда ҳайдовчисиз юришга ўргатди. Табиийки, гап хайвейлар ҳақида кетмоқда, шаҳарнинг тиқилинч йўлларида юришга Хотцнинг технологияси мослаштирилмаган.
Келажакда у мазкур технологиясини қиммат бўлмаган видеокамералар ва автомобилни бошқарадиган дастурий таъминотдан иборат пакет кўринишида сотишни режалаштирган. Пакет нархини 1000 доллар баҳолаган Жорж маҳсулотини автомобиль ишлаб чиқарувчиларга ҳам, фойдаланувчиларга ҳам сотишни кўзламоқда.
Изоҳ (0)