КХДРнинг бомбасидан қўрқаётган Япония, четлатилган Бензема, Лоланинг либоси ва куннинг бошқа муҳим янгиликлари

«Дарё»да доимий рукн — ҳар куни энг муҳим янгиликларнинг кечки дайжести бериб борилади.

1. Япония Мудофаа вазирлиги КХДРнинг водород бомбаси ҳақидаги хабарлардан хавотирга тушмоқда. Шимолий Кореяда водород бомбаси борлиги ҳақидаги хабар Жанубий Кореяни гўёки хавотирга солмагани ҳақида кеча, 10 декабрь куни хабарлар берилганди.

2. Россия Тергов қўмитаси Ходорковскийни Нефтеюганск мэрини ўлдиришда айблади. 2013 йил охирида Путиннинг авфига кўра озодликка чиқарилган Михаил Ходорковский яна озодликдан маҳрум этилиши мумкин.

3. Forbes Amazon асосчисини йилнинг энг омадли миллиардери деб атади. Йил охирига яқинлашганимиз сайин, ҳар куни бирор нашр ўз талқини бўйича йилнинг «энг, энг, энг» қандайдир одамини эълон қилади. Аввалроқ Time Германия канцлери Ангела Меркелни «Йил одами» деб эълон қилганди.

4. Карим Бензема уни термадан четлатган Франция футбол федерациясининг қарорини ҳурмат қилишини билдирди. Майдонда фойдали бўлган бу футболчи майдон ташқарисидаги хатти-ҳаракати сабаб, Европа чемпионати арафасида ўзига жабр қилди, сўзсиз. Айтмоқчи, эртага, 12 декабрь, шанба куни Евро—2016 га қуръа ташланади.

5. Лоланинг лицензиядан айрилишига сабаб бўлган либоси аукционда сотилади, тушган маблағ хайрияга сарфланади. Хонанда ҳақиқатан ўша либосидек шов-шувли интервью берган — у нима учун ажрашганини айтган, шунингдек, либос кишининг қилмоқчи бўлган амалига таъсир қилмаслигини тушунтиришга ҳаракат қилган.