АҚШ махсус хизматлари Туркияни россияликларга қарши терактлар уюштирилиши мумкинлиги ҳақида огоҳлантирди

АҚШ Марказий разведка бошқармаси (МРБ) Туркияга махсус хизматлар маълумотларини етказди, уларга кўра, мамлакат ҳудудида россиялик сайёҳларга қарши терактлар тайёрланиши мумкин, деб ёзади «РБК» Haberturk’ка таяниб. Ҳужумлар A321’нинг Синайдаги ҳалокати билан боғлиқ бўлиши мумкин.

Туркия ички ишлар вазирлиги мамлакатнинг 81 та провинциясига МРБ маълумотларига асосланган огоҳлантиришларни жўнатган. АҚШ махсус хизматлари ахборотига кўра, ИШИД гуруҳига алоқадор уч фаластинлик ва яна бир худкуш террорчи Туркиядаги россиялик сайёҳларга ҳужум тайёрламоқда.

Нашр фаластинлик террорчилар исмларини келтирган. МРБга кўра, улар 31 октябрда Россиянинг Airbus A321 самолёти ҳалокати билан боғлиқ терактга алоқадор бўлиши мумкин.

Haberturk ёзишича, Туркияда ИШИДга алоқадор террорчи Абу Халид юрибди, у мамлакат ҳудудида терактни режалаштирган одам билан алоқага чиққан.