Владимир Жириновский суд орқали Михаил Горбачёвдан 6300 рубль ундирди

Москва шаҳар Тимирязевский тумани суди Россия Либерал-демократик партияси (РЛДП) етакчиси Владимир Жириновскийнинг СССР собиқ президенти Михаил Горбачёвга нисбатан шаън ва қадр-қимматни ҳимоя қилиш бўйича даъвосини қаноатлантирди. Бу ҳақда Meduza хабар бермоқда.

Суд Горбачёвга «После Кремля» («Кремлдан сўнг») китобида ёзилган, 1996 йили Горбачёвга уюштирилган ҳужумга Жириновскийнинг алоқадорлиги ҳақидаги сўзлар юзасидан раддия бериш мажбуриятини юклади, шунингдек, 6300 рубль (тахминан 260 минг сўм) миқдоридаги суд харажатларини Жириновский фойдасига қоплашни буюрди. Бу пулнинг атиги 300 рубли (тахминан 13 минг сўм) Жириновскийга тегади, қолгани РЛДП ҳисобига тушади.

Суд Жириновский экстремистик шиорларни айтгани ҳақидаги китобдаги ахборотни ёлғон ва қадр-қимматга путур етказувчи деб тан олишдан бош тортди.

Владимир Жириновский Михаил Горбачёвни 30 сентябрь куни судга берганди. У «После Кремля» китоби нашр этилганидан сўнг етказилган маънавий зарар учун СССР собиқ президентидан миллион рубль миқдорида товон пули талаб қилганди.

Маълумот учун, «После Кремля» китоби Михаил Горбачёвнинг катта сиёсатдан кетганидан кейинги ҳаётига бағишланган.