Moskva shahar Timiryazevskiy tumani sudi Rossiya Liberal-demokratik partiyasi (RLDP) yetakchisi Vladimir Jirinovskiyning SSSR sobiq prezidenti Mixail Gorbachyovga nisbatan sha’n va qadr-qimmatni himoya qilish bo‘yicha da’vosini qanoatlantirdi. Bu haqda Meduza xabar bermoqda.
Sud Gorbachyovga “Posle Kremlya” (“Kremldan so‘ng”) kitobida yozilgan, 1996-yili Gorbachyovga uyushtirilgan hujumga Jirinovskiyning aloqadorligi haqidagi so‘zlar yuzasidan raddiya berish majburiyatini yukladi, shuningdek, 6300 rubl (taxminan 260 ming so‘m) miqdoridagi sud xarajatlarini Jirinovskiy foydasiga qoplashni buyurdi. Bu pulning atigi 300 rubli (taxminan 13 ming so‘m) Jirinovskiyga tegadi, qolgani RLDP hisobiga tushadi.
Sud Jirinovskiy ekstremistik shiorlarni aytgani haqidagi kitobdagi axborotni yolg‘on va qadr-qimmatga putur yetkazuvchi deb tan olishdan bosh tortdi.
Vladimir Jirinovskiy Mixail Gorbachyovni 30-sentabr kuni sudga bergandi. U “Posle Kremlya” kitobi nashr etilganidan so‘ng yetkazilgan ma’naviy zarar uchun SSSR sobiq prezidentidan million rubl miqdorida tovon puli talab qilgandi.
Ma’lumot uchun, “Posle Kremlya” kitobi Mixail Gorbachyovning katta siyosatdan ketganidan keyingi hayotiga bag‘ishlangan.
Izoh (0)