Терговчилар Борис Немцов ўлдирилишини уюштиришда гумон қилинаётган шахсни Бирлашган Араб Амирликларидан топишга ҳаракат қилиб кўради. Бу ҳақда «Интерфакс» хабар бермоқда.
Қотилликни уюштиришда Росия ИИВ ички қўшинларининг собиқ ҳарбий хизматчиси Руслан Муҳиддинов гумон қилинмоқда. Терговчилар у яшириниши мумкин бўлган Чеченистоннинг Шелковский туманида уни қидириб кўрган, бироқ бу ҳаракатлар беҳуда кетганди.
Тергов маълумотларига кўра, Муҳиддиновнинг БААда кўчмас мулки бор ва у ерда оиласи истиқомат қилади. Таъкидлаш лозимки, Россия ва БАА жиноий ишларда гумонланувчи ҳамда айбланувчи шахсларни топшириш бўйича шартнома имзолаган. Президент Владимир Путин яқин орада мазкур ҳужжатни ратификация қилиш учун Давлат думасига юбориши кутилмоқда.
Олдинроқ Муҳиддинов халқаро қидирувга берилганди. 18 ноябрь, чоршанба куни Москвадаги Басманний суди Тергов қўмитасининг уни сиртдан қамоққа олиш тўғрисидаги сўровини кўриб чиқиши кутилмоқда.
Изоҳ (0)