Ўзбекистон мусулмонлари идорасининг Тошкент шаҳар вакили, Тошкент шаҳар бош имом-хатиби Анвар Қори Турсунов Юнусобод туманидаги «Минор» жомеъ масжиди имом-хатиби этиб тайинланди. Бу ҳақда «Дарё»нинг ЎМИ Тошкент шаҳар вакиллигидаги манбаси маълум қилди.
Анвар қори Турсунов бунгача Шайхонтоҳур туманидаги «Хожа Аҳрори Валий» масжиди имом-хатиби эди. 2014 йил октябрь ойида очилган «Минор» масжидига эса шу вақтгача Раҳматиллоҳ қори Сайфиддинов имомлик қилаётганди.
Маълумот учун, Анвар қори Турсунов 1958 йил Тошкент шаҳрида туғилган бўлиб, 1981 йил Тошкент Давлат университети (ҳозирги ЎзМУ)нинг филология факультетини, 2001 йил Тошкент Ислом институтини тамомлаган. Анвар қори Турсунов 1999 йилдан буён Тошкент шаҳар бош имом-хатиби вазифасида фаолият юритиб келмоқда. У 1989—1992 йилларда Қуръони каримнинг биринчи ўзбекча таржимасига (Шайх Алоуддин Мансур таржимаси) муҳаррирлик қилган.
Изоҳ (0)