Тошкент шаҳрида 2 ноябрь, душанба куни италян қаҳвасини ичиб, китоб варақлаш мумкин бўлган кафеси, идора моллари бўлими ва китоб ихлосмандлари учун бошқа қизиқарли таклифлари бор икки қаватли китоб дўкони — «Китоб олами» иш бошлади. VOT мазкур дўкондан фоторепортаж тайёрлади.
Собиқ Консерватория биноси яқинида жойлашган «Китоб олами» ташрифчиларни катта ойнаванд «деворлар» ва ёрқин реклама экрани билан кутиб олади. Ичкарига киргандан сўнг, устки кийимингизни гардеробхонага топшириб, дўкон бўйлаб саёҳатни бошлашингиз мумкин.
Дўкон тўрт бўлим — ўзбек, рус, чет эл ва болалар адабиёти бўлимларидан ташкил топган. Биринчи қаватдаги катта залнинг 21 шўъбасида тарихий романлар, замонавий детективлар, илҳомлантирувчи адабиётлар, таълим нашрлари, бизнес мавзудаги китоблар ҳамда ихтисослашган қўлланмаларни топиш мумкин.
Чет эл адабиёти ихлосмандлари эътибори учун хорижий китобларнинг таржималари ҳавола этилган. Масалан, Нобель мукофоти соҳиби Габриэл Гарсиа Маркеснинг романларини ўзбек тилида ўқиш мумкин. Иккинчи қаватдаги кўзгули шифт селфи ишқибозларини, чет эл нашриётлари маҳсулотлари эса китобхонларни хурсанд қилиши аниқ.
«Китоб олами» Ўзбекистоннинг 110 нашриёти ва Россиянинг «Олма Медиа Групп» ҳамда «Экспо» ноширлик уйлари билан ҳамкорлик қилади. Чет эл ҳамкорларидан китоблар ҳар чоракда бир марта, Ўзбекистондаги нашриётлардан эса деярли ҳар куни келиб туради.
Идора моллари билан савдо қилувчи бўлимдан ўтиб, болалар адабиёти бўлимига кириб келасиз. Бўлим мавзусига хос равишда жиҳозланган: мультфильм қаҳрамонлари, юмшоқ ўйинчилар, ёрқин ранглар — буларнинг бари ўзига хос ёқимли муҳитни юзага келтиради. Бўлим пештахталарида ўзбек, рус ва инглиз тилларида чоп этилган эртаклар, бўёш китоблари, энциклопедиялар, ўйинли нашрларни топиш мумкин.
Кейинги бир ой давомида дўконда доимий харидорлар учун чегирмалар ва дисконт-карталар тизимини жорий этиш кўзда тутилган. Бундан ташқари, «Бахтли харидор» акциясини ишга тушириш режалаштирилган — дўкондаги баъзи китобларнинг ичида омадли штрих-код яширинган бўлади, бу штрих-код эгасига айланган харидор ютуқли лотереяда иштирок этиши мумкин.
Дўкондаги қаҳвахона эса қулай ва ҳордиқ чиқаришга мўлжалланган. Токчаларга жаҳон адабиёти тараққиёти ҳисса қўшган адибларнинг суратлари ва таржимаи ҳоллар қисқа ва чиройли кўринишда жойлаштирилган. Кафе менюси ҳозирча фақат пишириқлардан иборат, бироқ яқин вақт ичида фаст-фуд ва иссиқ таомлар ҳам пайдо бўлиши кутилмоқда.
У ёки бу китобни излашни осонлаштириш мақсадида «Китоб олами»га тез орада махсус планшетлар жойлаштирилади, шунингдек, муштарийлар китобларни kitobolami.uz сайти орқали сотиб олиш имконига ҳам эга бўлишлари ваъда қилинмоқда. Бундан ташқари, дўконда даврий босма нашрлар бўлимини очиш, Тошкентдаги ёзувчи ва шоирлар билан ижодий учрашувлар ҳамда тақдимотлар ўтказиш режалаштирилган.
Аввалроқ, Тошкентнинг Мустақиллик кўчасида иш бошлаган «Китоб олами» дўкони «Ўрта Осиёдаги энг катта китоб дўкони» дея таърифланаётгани ҳақида хабар берилган эди.
Изоҳ (0)