АҚШ Давлат котиби Жон Керри Қозоғистон пойтахти Остонадаги Назарбоев-Университетда Бирлашган Миллатлар Ташкилоти аслида Амир Темур ҳукмронлик қилган даврда Самарқандда ташкил этилганини маълум қилди. Бу ҳақда «12news.uz» хабар бермоқда.
Эслатиб ўтамиз, АҚШ Давлат котиби Жон Керри 1 ноябрь куни Самарқандга ташриф буюрганди. Самарқандда уни Ўзбекистон Президенти Ислом Каримов қабул қилди, шунингдек, у Марказий Осиё давлатлари ташқи ишлар вазирлари иштирокидаги музокараларда қатнашди.
«Мен тоғлар ва даштлар оша одамлар учрашган, турли минтақаларнинг маҳсулотлари ва ғоялари тўқнашган жойни ўз кўзларим билан кўрдим. Мен мана бу ғоят ажойиб ҳикояни яна бир бор такрорлашни истардим. XV аср бошида Кастилия қироли Генрих Учинчи ўз элчиси де Клавихони Амир Темурнинг олдига юборган. Де Клавихонинг узоқ саёҳати Константинополь, Трапезунд орқали, шундан сўнг Шимолий Эрондан ўтиб, Ўрта Осиёга, Самарқандга қадар давом этган. Шу ерда у Амир Темур томонидан қабул қилинган», — деди Керри.
«Де Клавихо ўз кундаликларида Ғарб учун янги, шу вақтгача номаълум бўлган турмуш тарзининг қизиқарли манзарасини тасвирлаган. У маданиятлар, санъат, савдо ва ғоялар чорраҳасига таъриф берган. Самарқандда сиз қимматбаҳо ипак, саноат маҳсулотлари ва тилла, мовий шиша ва чиннини топишингиз мумкин эди. Бу шаҳарда бир вақтнинг ўзида турклар, араблар, мусулмонлар, яҳудийлар, юнонлар, арманлар, насронийлар, католиклар ва несторианлар ўзаро мулоқот қилган», — деди АҚШ Давлат котиби.
«Биз Бирлашган Миллатлар Ташкилоти бундан 70 йил аввал Нью-Йоркда ташкил этилган, деб ҳисоблаймиз. Йўқ. Аслида бу ҳодиса бундан юз йиллар аввал Самарқандда юз берган», — дея қўшимча қилди АҚШ Давлат котиби Жон Керри.
Изоҳ (0)