«Потребитель.уз» салонда сигарета чекадиган, йўл ҳаракати қоидаларига риоя қилмасдан бошқа ҳайдовчилар билан «кимўзарга» ўйнайдиган, бир-бирининг йўлини кесиб чиқадиган йўналишли такси ҳайдовчиларнинг «адабини бериш» йўлларини келтирди.
«Биз автобус ва йўналишли таксиларда бепул юрмаймиз ва жамоатчилик шартномасининг барча шартлари бажарилишини талаб қилишга ҳақлимиз», — дейилади хабарда.
Унда қайд этилишича, «Алкоголь ва тамаки маҳсулотларини тарқатиш ва истеъмол қилишни чеклаш тўғрисида»ги қонуннинг 4-боб, 19-моддасига мувофиқ, иш жойларида, соғлиқни сақлаш, таълим, спорт-соғломлаштириш муассасаларида, ёнғин учун хавфли бўлган жойлар, шу жумладан, автомобилга ёнилғи қуйиш станциялари ва бошқа жамоат жойларида (махсус ажратилган жойлардан ташқари), шунингдек, жамоат транспортининг барча турларида тамаки маҳсулотларини истеъмол қилишга йўл қўйилмайди.
Нашр «Ўзшаҳартрансхизмат» сайти орқали махсус формани тўлдириб, мурожаат юборишни таклиф этган, бунда «маршрутка» рақами ва вақтни кўрсатиш кифоя. Шунингдек, Давлат хизматлари ягона портали орқали ҳам арзнома бериш мумкинлиги айтилган.
Изоҳ (0)