АҚШ элчихонаси «Грин кард»да қатнашиш учун воситачи фирмалар хизматидан фойдаланмасликка чақирди

«Грин кард» лотереясида рўйхатдан ўтиш 1 октябрь куни бошланган бўлиб, 3 ноябрга қадар давом этади, дея хабар бермоқда «12news.uz»

«2017 йил Турли миллат вакиллари учун иммиграцион виза лотереяси — DV» («Грин кард») дастурида иштирок этиш учун Ўзбекистон фуқаролари ўрта таълимга тенг маълумотни олган бўлиши керак. Рўйхатга олиш фақат онлайн режимда амалга оширилади. Барча аризалар http://www.dvlottery.state.gov интернет саҳифасида электрон кўринишда топширилади.

АҚШнинг Ўзбекистондаги элчихонаси лотереяда иштирок этишга қизиқиш билдираётган шахсларни турли фирмалар хизматларидан фойдаланмаслик ва уларга пул тўламаслик ҳақида огоҳлантирди. Элчихонанинг алоҳида қайд этишича, лотереяда иштирок этиш бепул, унда иштирок этмоқчи бўлганлар воситачиларни жалб этмай аризаларни ўзлари тўлдирганлари маъқул.

«АҚШ Давлат департаменти дастур иштирокчиларидан, улар ғолиб сифатида АҚШ элчихонаси ёки консуллигига виза суҳбатидан ўтиш учун мурожаат қилмагунича, пул олмайди. Виза суҳбатига қадар олдиндан пул тўлаш кераклиги ҳақидаги ҳар қандай хат ёки билдиришнома фирибгарларнинг иши сифатида баҳоланиши керак», — дейди АҚШ элчихонаси Консуллик бўлими раҳбари Райан Хейли.

АҚШ элчихонаси вакилларининг таъкидлашича, «Грин кард» лотереясида иштирок этиш учун воситачи фирмалар хизматидан фойдаланиш, биринчидан, унда ғолиб чиқиш имкониятини оширмайди. Иккинчидан, воситачи анкетада иштирокчининг эмас, балки ўзининг манзилини кўрсатади ва иштирокчи ғолиб чиқса, зарур маълумотларни тақдим этиш учун катта миқдорда пул талаб қилиши мумкин.

Учинчидан, воситачи қўлга киритган маълумотлари асосида келажакда ўзи иштирокчи ўрнига ариза тўлдириши мумкин, бундай ҳолатда иштирокчининг ўзи мустақил равишда ариза тўлдирса, бир киши номидан иккита ариза тизимга келиб тушади, бу ҳолат лотерея қоидаларига зид бўлиб, иштирокчи четлатилади. Чунки бир иштирокчи бир йилда фақат бир марта ариза топшириши мумкин.

Райан Хейлининг сўзларига кўра, АҚШ Консуллик хизматлари бюроси веб-сайтида DV 2017 дастури бўйича ўзбек ва рус тилларидаги йўриқномалар билан танишиш мумкин. Лотерея натижаларини 2016 йил 3 май санасидан бошлаб текшириш мумкин.