Самарқанд вилоятининг Каттақўрғон шаҳридаги қадимий ҳаммом қайта ишга тушди

Самарқанд вилоятининг Каттақўрғон шаҳрида жойлашган қадимий ҳаммомлардан бири яна шаҳар аҳолисига хизмат кўрсата бошлади, деб хабар беради «Самаркандский Вестник».

Очилдимурод Мирий номидаги маҳалла ҳудудида жойлашган ҳаммом ХVII асрда шаҳарнинг бой фуқароларидан бири Муҳаммад Нақиббек томонидан қурилган эди. Архив маълумотларига кўра, ҳаммом охирги марта 1888 йилда қайта таъмирдан чиқарилган. Ўшандан бери у яроқсиз аҳволга келиб қолган эди. Унинг аксарият хоналари бузилиб кетган.

Бироқ бир неча йил аввал каттақўрғонлик тадбиркор Муҳиддин Эшмонов уни қайта тиклашга қарор қилди. У объектнинг дастлабки лойиҳасини топиб, унга асосланган ҳолда бинони қайта таъмирдан чиқаришга киришди. Бинонинг вайрон бўлган қисмлари қайта тикланиб, канализация тармоғига уланди, иситиш тизими янгиланди.

Шундай қилиб узоқ йиллардан сўнг, оддий ҳаммом яна шаҳар аҳолисига хизмат кўрсата бошлади.