Germaniyaning Myur-am-Zee shahrida o‘zbekistonlik ikki talaba O‘zbekistonga mehr qo‘ygan oila uchun tandir qurib berdi. Bu haqda “Daryo”ga Avazbek Mamasaidov ma’lum qildi.
“Xiva gilami, qizil gulli adrasdan tikilgan to‘shak-bolish bilan bezatilgan so‘ri. Xontaxtaga dasturxon yozilgan, paxta gulli choynakka achchiqqina ko‘k choy damlangan. Bunday manzarani oddiy bir o‘zbek xonadonida uchratish mumkin. Ayni damda Germaniyaning Myur-am-Zee shahrida istiqomat qiluvchi Ortslar xonadonida ham yuqorida aytilgan o‘zbek milliy buyumlaridan bor. Butun boshli so‘ridan tortib o‘choq-qozon-u kabob qo‘ragacha topiladi. Bir necha kun avval esa ular haqiqiy o‘zbekcha tandirga ham ega bo‘ldi”, — deb yozadi Avazbek.
Ortslar oilasi ish yuzasidan O‘zbekistonda uch yildan ziyod vaqt yashagan va vataniga ajoyib taassurotlar bilan qaytgan.
“O‘zbekistonda o‘tkazgan yillarimiz hayotimizning eng qiziqarli onlari bo‘ldi, — deydi janob Gans-Oulter Orts. — Ilk kunlardanoq o‘zbeklarning samimiyligi, ochiq muomalasi va mehmondo‘stligini his etdim”.
“Safarimiz avvalida o‘zbek tilini boshlang‘ich darajada o‘rgangan edik va bu men uchun juda foydali bo‘ldi, — deydi Orts xonim. — Uy-ro‘zg‘or buyumlarini bozorlarda savdolashib sotib olish, mahalliy aholi bilan muloqot qilish menga juda yoqar edi. O‘zbekistonda o‘zimni xuddi o‘z uyimdagidek his etar edim”.
Avazbek yozishicha, Germaniyaga qaytar ekan, Ortslar oilasi esdalik sifatida o‘zlari bilan ko‘plab o‘zbek milliy buyumlarini olib ketishga harakat qildi. Natijada xonadonga tashrif buyurgan mehmon uyning har joyidan O‘zbekiston tafti urib turganini his etishi mumkin.
Izoh (0)