Франция президенти Франсуа Олланд ва Германия канцлери Ангела Меркель «Норманд тўртлиги» мажлиси арафасида Россия президенти Владимир Путин билан навбатма-навбат музокаралар ўтказди. Бу ҳақда «Сегодня.ua» хабар бермоқда.
Дастлаб Путин билан Олланд музокаралар олиб борди. Ёпиқ эшиклар ортида ўтган учрашувда Россия томонидан ташқи ишлар вазири Сергей Лавров, Путиннинг ёрдамчиси Юрий Ушаков ҳамда матбуот котиби Дмитрий Песков қатнашган.
Шундан сўнг, Путин Меркель билан учрашган. «Учрашувлар Париждаги Елисей саройида, Украинадаги вазиятни тартибга солиш бўйича «норманд тўртлиги» форматидаги музокаралар арафасида ўтказилмоқда», — дейилади Кремль матбуот хизмати хабарида.
Украина, Франция, Россия ва Германия етакчиларининг ёпиқ эшиклар ортида ўтадиган музокаралар якуни бўйича қандайдир ҳужжат қабул қилиниш-қилинмаслиги ҳозирча номаълум. Қайд этиш жоиз, 1 октябрь куни Олланд ва Меркель Украина президенти билан навбатма-навбат суҳбатлашганди.
Экспертларнинг фикрича, бўлажак учрашув «Минск келишулари»ни «қутқариб қолиш»га қаратилган, унда кўтариладиган бош мавзу эса Донбассдаги сайловлардир.
Изоҳ (0)