Ўзбекистон Футбол Федерацияси президенти Мираброр Усмонов «Пахтакор» футбол клуби раҳбарлари ўрнида бўлганида, ўз ихтиёрига кўра футболдан кетган бўларди. У бу ҳақда 2 октябрь куни ЎФФда Ўзбекистон терма жамоалари мураббийлари, Олий Лига клубларининг мураббийлари ва раҳбарлари, Федерация ва Профессионал футбол лигасининг мутасаддилари иштирокида бўлиб ўтган йиғилишда айтиб ўтди, дея хабар бермоқда ЎФФ матбуот хизмати.
Маълумот учун, ЎФФ Ижроия қўмитаси 25 сентябрь куни футбол бўйича Ўзбекистон Олий Лигаси доирасидаги «Пахтакор» — «Металлург» (3:2) учрашувининг сўнгги дақиқаларини спорт принциплари ва этикасига зид топиб, «Металлург» бош мураббийи Рустам Мирсодиқовни 2015 йил мавсум охирига қадар мураббийлик лицензиясидан маҳрум қилди.
«Мен жамоатчилик фикрини ўрганиб чиқар эканман, мухлис ва журналистларнинг ўринли саволларига дуч келяпман: нега фақат бир томон жазога тортилди? Гап шундаки, ушбу масалани ўрганиш асносида келишилган ўйинларга қарши курашиш бўйича экспертлар кенгаши раиси Аҳрол Иноятов «Пахтакор» клуби бўйича ҳеч қандай ҳужжат ёки исбот топа олмади. Биламиз, «Пахтакор» халқ жамоаси, лекин мавсум якунлари бўйича «Пахтакор», чемпион бўладими, кумуш ёки бронза медалларини оладими, қандай ўринни олишидан қатъи назар, бўлиб ўтган воқеалардан кейин жамоа аъзолари бу медалларни қандай тақиб юришаркин? », — деди Мираброр Усмонов.
«Биз «Пахтакор»ни мана шу томонлари учун ёшларимизга ўрнак қилиб кўрсатишимиз керакмиди? Шуми халқ жамоаси? Бу ишларнинг бошида ким турибди? Умуман, «Пахтакор» жамоаси раҳбарлари ҳам кўчага чиқишга уялармикин? Мен бундай шармандаликни кўтаролмаган бўлардим. Билмадим, қандай бош кўтариб юришибди. Уларнинг ўрнида бўлганимда ўз ихтиёримга кўра, яхшиликча футболдан кетардим», — деди Усмонов.
«Энди «Пахтакор» нега жазоланмади?» деган саволларга жавоб бериб ўтсам: йил якунларига кўра «Пахтакор» шундай жазоланадики, футбол ишқибозларини қинғир ўйинлар билан алдаш уёқда турсин, бу ҳақда ҳаёлига ҳам келтирганлар ҳам тавба қилади. «Умуман ким деб ўйлаяпти ўзини бу «Пахтакор» раҳбарлари? «Металлург» билан можаро совиб улгурмай, бош мураббий Нўъмон Ҳасановнинг Фарғонада «Нефтчи»га қарши ўйинда ўзини қандай тутганини нима билан изоҳлаш мумкин?» – дея қўшимча қилди Мираброр Усмонов.
Изоҳ (0)