1 октябрь куни Тошкентдаги «Ўзбекистон» спорт саройида дзюдо кураши бўйича Гран-При туркумига кирувчи йирик халқаро турнир бошланди. Мазкур нуфузли мусобақада дунёнинг 52 давлатидан 355 нафар спортчи жами 14 та вазн тоифасида совринли ўринлар учун кураш олиб бормоқда, деб хабар беради «Оламспорт».
Мусобақанинг илк куни эркаклар 60 ва 66 кг вазн тоифасида татамига чиқди. 60 кг вазн тоифасида Ўзбекистон шарафини ҳимоя қилган Шарофиддин Лутфуллаев финалга қадар мағлубиятсиз етиб келди. Ҳал қилувчи баҳсда у япониялик Юма Ошимага имкониятни бой бериб, кумуш медаль билан тақдирланди. Ушбу вазн тоифасида татамига чиққан яна бир ўзбекистонлик дзюдочи Диёрбек Ўрозбоев эса бронза медалига сазовор бўлди.
Лутфуллаев финалга қадар яманлик Али Хусров, туркиялик Ахмет Каба, ярим финалда қирғизистонлик Отар Бестаевни мағлубиятга учратди. Ўрозбоев эса айнан Бестаевга имкониятни бой берган эди. Бронза медали учун кечган баҳсда у аввалига Ахмет Кабани, кейин туркиялик Бекер Ўзлуни таслим этди.
66 кг вазн тоифасида иштирок этган Тимур Худойқулов, Ҳамиджон Мўминов, Асадулло Бозоров ва Достонжон Холиқуловлар саралаш баҳсларидаёқ мағлубият аламини тотиб кўрди. Хотин-қиз дзюдочилар ўртасидаги баҳсларда ҳам Ўзбекистон терма жамоаси аъзолари Мунира Каримова, Нодира Гулова (иккиси ҳам 48 кг), Дилдора Убайдуллаева, Муқаддас Кубеева (иккиси ҳам 52 кг), Шаҳзода Усмонова, Дилдор Шерметова (иккиси ҳам 57 кг) мағлубиятга учради.
Биринчи кунги баҳслар якунига кўра дзюдо ватани – Япония терма жамоаси 2 та олтин медали билан пешқадамлик қиляпти. Жанубий Корея терма жамоаси ҳисобида 1 тадан олтин ва кумуш медаль бор. Мўғулистон ва Туркманистон терма жамоалари бир нафардан чемпионга эга. Биттадан кумуш ва бронза медалига эга бўлиб турган Ўзбекистон ҳозирча 7-ўринда.
Эслатиб ўтамиз, Тошкент Гран-Присининг мукофот жамғармаси 100 000 АҚШ долларини ташкил қилади. Ушбу Гран-При мусобақасида 2016 йили Рио-де-Жанейро шаҳрида ўтказиладиган XXXI ёзги Олимпия ўйинларининг йўлланмалари учун рейтинг очколар ҳам ўйналяпти. Мусобақада олтин медалга сазовор бўлган спортчилар 300 рейтинг очкосига, иккинчи ўрин соҳиблари 180, бронза медали совриндорлари эса 120 рейтинг очколарига эга бўлади.
Изоҳ (0)