O‘zbekiston BMT shafeligida Orol dengizi va Orolbo‘yi hududi bo‘yicha maxsus Trast fondi tuzilishini maqsadga muvofiq deb biladi. Bu haqda O‘zbekiston tashqi ishlar Vaziri Abdulaziz Komilov Nyu-Yorkda BMTning Barqaror rivojlanish bo‘yicha sammitidagi chiqishi chog‘ida ma’lum qildi, deya xabar beradi “Gazeta.uz”.
O‘zbekiston taklifiga ko‘ra, Trast fondining asosiy vazifasi quyidagi muhim yo‘nalishlardagi harakatlarni muvofiqlashtirish hamda manzilli dasturlar va loyihalarni amalga oshirishdan iborat bo‘ladi:
- Orolbo‘yi hududining ijtimoiy-iqtisodiy rivojlanishi uchun ta’sirchan choralar tizimini shakllantirish, mazkur mintaqada yashovchi aholining munosib turmush tarzini ta’minlash uchun kerakli sharoitlar yaratish, salomatligini muhofaza etish va genofondini asrash;
- Orolbo‘yidagi ekologik muvozanatni asrash, cho‘llashishga qarshi choralar ko‘rish, suvdan oqilona foydalanishni joriy etish;
- ayni paytda yo‘qolib ketish arafasida turgan noyob flora va faunani saqlab qolish, hayvonot va o‘simlik dunyosining bioxilma-xilligini tiklash;
- mintaqaning cheklangan suv resurslari, birinchi galda Amudaryo va Sirdaryodan mintaqadagi barcha mamlakatlar manfaatlari va xalqaro huquq normalariga qat’iy rioya etgan holda foydalanish.
Eslatib o‘tamiz, 2013-yili BMT Bosh Assambleyasining 68-sessiyasida O‘zbekiston tomonidan taklif etilgan “Orol qurishi oqibatlarini bartaraf etish va Orolbo‘yida ekotizimlar halokatining oldini olish bo‘yicha chora-tadbirlar Dasturi” rasmiy hujjat sifatida ma’qullagan edi.
Izoh (0)