Ўтган ҳафта ёнғиндан зарар кўрган 12 қаватли офис биносида қолиб кетган уч кишидан бири «Газета.uz» нашрига ҳаётларини сақлаб қолган қутқарув операцияси ҳақида гапириб берди.
Virsaviya-Projekt лойиҳавий ташкилоти таъсисчиси Сергей Дроздов Амир Темур кўчасидаги 25-рақамли бинонинг 11-қаватида қолган сўнгги киши эди. Унинг сўзларига кўра, ўт ўчириш ва бошқа хизматлар амалга оширган чора-тадбирлар туфайлигина ҳодиса аянчли оқибатларсиз якун топган.
Дроздов бир эркак ва бир қиз билан 11-қаватдаги ярим очиқ балконда ёнғиндан жон сақлашга интилган ва кўчада турган қутқарувчи ва гувоҳларга турли йўллар билан сигналлар бера бошлаган. Заҳарли тутун туфайли улар бинодан чиқиб кета олмаган.
«10 дақиқадан сўнг кучли кислород етишмовчилиги бошланди, саросима ва ўз ҳаётимиз учун кучли хавотир юзга келди», — деди у.
Ўт ўчирувчилар гуруҳи ёнғин ўчоғига етиб келганидан беш дақиқа ўтиб, бино тўлиқ қуршаб олинди ва токдан узилди. Ёнғин бошланганидан ярим соат ўтиб эса, Дроздов ва унинг ҳамроҳлари ёнига икки қутқарувчи етиб келган ва эвакуация йўриғини тезгина тушунтириб берган. Улар кийимларини ичимлик сувига намлаб, уни юзларига ниқоб сифатида қўллаган ва беш киши қўл беришиб пастга туша бошлаган. Нафас оладиган ҳаво бўлмагани сабабли ўт ўчирувчилар вақти-вақти билан ниқобларини ечиб, уларга дам бериб турган.
Бинодан чиққач, жабрланганларга биринчи тиббий ёрдам кўрсатилган, кейинроқ уларни Республика шошилинч тиббий ёрдам илмий марказига етказишган, у ерда уларни тўлиқ ҳушига келтириб, кўрикдан ўтказиб, уйига юборишган.
Дроздов ҳодисадан омон чиққани учун махсус хизматлардан миннатдор эканлигини изҳор этди.
Эслатиб ўтамиз, Олой бозори яқинидаги Бизнес марказда 18 сентябрь куни ёнғин рўй берган эди. Кейинроқ Ички ишлар вазирлиги ёнғин бинонинг иситиш тизимида олиб борилган пайвандлаш ишлари пайтида ёнғин хавфсизлиги қоидаларига риоя қилинмаганлиги оқибатида келиб чиққанлигини аниқлаб, қурбонлар ва жароҳат олганлар йўқлигини маълум қилган эди.
Изоҳ (0)