Тошкент осмонида номаълум учар жисм кўрингани хабар қилинди

Бугун, 22 сентябрь куни Тошкент осмонида номаълум учар жисм кўринди. Унинг суратлари ва видеолари Facebook’даги турли гуруҳларда пайдо бўлди.

Жойланган сурат изоҳида учар жисм Тошкент вақти билан 18:20 да осмонда кўрингани айтилган. У аввалига горизонтал йўналиш бўйлаб ҳаракат қилган, кейин эса пастга катта тезликда туша бошлаган. Постни қолдирган фойдаланувчи унинг комета эканлигини тахмин қилган.

«Водители Ташкента» гуруҳи фойдаланувчилари Юнусобод тумани ва Чорсу бозори атрофида учар жисмни кўришганини ёзган.

Изоҳ қолдирган фойдаланувчилардан бири бу катта эҳтимол билан метеор эканлигини, чунки метеорлар тезда ёниб кетиши мумкинлигини билдирган. Бошқа фойдаланувчилар эса бу қўшни давлатлардан биридан учирилган ракета бўлиши мумкинлигини тахмин қилди.

Эслатиб ўтамиз, бундан бир ой муқаддам — 22 август куни ҳам Тошкент осмонида номаълум учар жисм кўринган. Аммо кейинчалик у Россиядан учирилган «Тополь» баллистик ракетаси эканлиги маълум бўлган эди.

Ўшанда Россиянинг Астрахан вилоятида «Капустин Яр» давлат марказий полигонидан РС-12М «Тополь» қитъалараро баллистик ракетаси синов парвозини амалга оширган ва Қозоғистондаги «Сари-Шаған» полигонидаги шартли нишонни берилган аниқлик билан бартараф этган эди.