Air India авиакомпаниясининг Airbus А321 самолёти Индира Ганди номидаги халқаро аэропортга қўнганидан сўнг ёниб кетди. Бу ҳақда авиакомпания баёнотига таяниб Reuters хабар берди.
Маълум қилинишича, учоқ Гонконгдан Нью Деҳлига учаётган бўлган. Йўловчилар самолётдан тушаётганда унинг электр генератори ёнган ва автоматик тарзда ўчган. Ҳодиса оқибатида йўловчилар ва экипаж аъзолари хавфсиз эвакуация қилинган.
Air India баёнотига кўра, лайнер “бир оз зарар кўрган”. Самолёт текширув ўтказиш учун вақтинча фойдаланишдан чиқарилган. Авиакомпания ҳодиса ҳақида авиация маъмуриятини хабардор қилган.
Июнь ойида Air India авиакомпаниясининг Аҳмадободдан Лондонга учаётган Boeing 787-8 Dreamliner самолёти ҳавога кўтарилганидан кўп ўтмай ҳалокатга учраганди. Бортда 230 нафар йўловчи ва 12 нафар экипаж аъзоси бўлган. Самолёт турар жой ҳудудига қулаган, унинг бўлаклари тиббиёт коллежи ётоқхонаси биносига бориб урилган. Оқибатда нафақат самолётдагилар, балки ҳудуд аҳолиси ҳам қурбон бўлган. Фалокат оқибатида 270 дан ортиқ киши ҳалок бўлган.
Изоҳ (0)