Стартап учун ғоя қанчалик муҳим?

Стартуп Factory.uz акселераторига ўз ғоясини доҳиёна деб билувчи ёшлар кўп келади (аслида эса улар яна бир Facebook очишни «ўйлаб топган»).

Россиялик инвестор Аркадий Морейниснинг «Уникал (ягона) ғоялар йўқ. Айни пайтда сизга янгилик ва оригиналлик намунаси бўлиб туюлаётган нарсани аслида юзлаб кишилар амалга оширишга уриниб кўрган ва иш бермагани учун ташлаб қўйган. Яна юзлаб кишилар айни вақтда худди шу нарсани қилмоқда. Яна юз киши буни эртага амалга оширишга уриниб кўради», — деган гапларига тўлиқ қўшиламиз.

Лойиҳанинг муваффақияти — ажойиб ғоя ўйлаб топиш натижаси эмас; лойиҳа муваффақияти буткул жамоа ва тўғри амалга оширишга боғлиқ. Лойиҳа муваффақиятининг 10 фоизи омад, 10 фоизи маблағ ҳамда 80 фоизи мақсадга эришиш йўлидаги қатъийлик ва компетенсиядан иборат.

Ғояларнинг ўзи ва уларнинг амалга оширилишини аниқ қилиб фарқлаш лозим. Ҳар битта лойиҳанинг ноёблиги ғояга эмас, унинг амалга оширилиши, «бизнес-девелопмент», зарур бизнес жараёнларини йўлга солиш қобилиятига боғлиқ.

Ва бу жамоа тузиш, савдо-сотиқни ташкиллаштириш, логистика, тўлов тизимлари, товарни қайтариш, B2B-шерикликни йўлга қўйишга алоқадор энг мураккаб вазифадир.

Ҳатто, Ғарбда ҳам ҳозир уникал ғоялар устун эмас. Одатда бу эски ғояларнинг такрорланиши, яхшиланган ғоялар, мавжуд лойиҳаларнинг қайта форматланишидир.

Стартап учун ғояни қандай топиш мумкин? Бу ҳақда келаси мақолаларда сўзлаб берамиз.

Лойиҳа «Дарё» ва StartupFactory.uz томонидан ишга туширилган.