Ўзбекистонликларнинг Саудия Арабистонига ҳаж сафарлари муваффақиятли давом этмоқда. Ҳозирга кунда Мадинаи мунаввара ва Маккаи Мукаррамадаги ўзбекистонлик зиёратчиларнинг сони 3500 дан ошди. Бу ҳақда Дин ишлари бўйича қўмита Ахборот хизмати хабар бермоқда.
«Мадинаи мунавварадаги 1200 дан зиёд ватандошларимиз кўтаринки руҳ билан Расулуллоҳ (с.а.в.)нинг равзалари, Уҳуд тоғи, Масжиди Қиблатайн ва Ислом тарихида илк бор барпо этилган ‘Қубо’ масжидини зиёрат қилмоқда.
Хусусан, Уҳуд тоғи ёнида ҳазрати Ҳамза розияллоҳу анҳу, у кишининг сафдошлари Мусъаб ибн Умайр ва Абдуллоҳ ибн Жаҳш розияллоҳу анҳумо ва бошқа саҳобийлар дафн қилинган қабристон зиёрат қилиниб, улар ҳақига дуолар қилинди», — дейилади Дин ишлари бўйича қўмита расмий сайтидаги хабарда.
Бундан ташқари, Макка шаҳрига етиб келган 2300 дан зиёд зиёратчи умра амалларини адо этиб, «Масжиди Ҳарам»да ибодат билан шуғулланаётгани айтилади.
«Юртдошларимиз ибодат учун барча шароитларни яратиб беришга ҳаракат қилаётган, чиройли муомала-муносабатларда бўлаётган ишчи гуруҳ аъзолари, шифокорлар, элликбошилар ва ошпазларнинг беминнат хизматларидан миннатдорлигини изҳор этмоқда.
Муборак ҳаж амалларини бажаришга хушнудлик билан тайёргарлик кўраётган зиёратчиларимиз азиз ва мўътабар Ватанимизга тинчлик ва осойишталик, халқимизга фаровонлик, дастурхонларимизга тўкин-сочинлик, муҳтарам Юртбошимизнинг эл-юрт манфаати йўлидаги барча хайрли ишларига муваффақиятлар тилаб дуолар қилмоқда», — деб якунланади Дин ишлари бўйича қўмита Ахборот хизмати хабари.
Изоҳ (0)