Республиканинг бешта маҳалласида ишга тушган янги механизм – «Ахборот ойнаси» эҳтиёжманд оилалар орасида тадбиркорлик ҳаракатининг ривожига ҳисса қўшди: жами 526,8 миллион сўм миқдоридаги имтиёзли кредит олган 137 нафар хотин-қиз тадбиркорликка илк қадамини қўйди.
Бундай кўрсаткичлар «Эҳтиёжманд оилаларга даромад манбаларини яратишда ижтимоий ёрдам кўрсатиш имкониятларини кенгайтириш бўйича янги дастурлар» лойиҳаси натижасида эришилди.
Лойиҳа Европа Иттифоқининг Институционал ривожланиш соҳасидаги ҳамкорлик дастури доирасида Миланнинг Савдо-саноат, ҳунармандчилик ва қишлоқ хўжалиги палатаси қошидаги «Формапер» агентлиги (Италия), Ўзбекистон Хотин-қизлар қўмитаси, Ижтимоий инновациялар жамғармаси (Литва) ва «Аёллар мулоқот ва таълим учун» ассоциацияси (Испания) таркибидаги ҳамкорлар жамоаси томонидан амалга оширилди.
Мазкур лойиҳадан кўзланган асосий мақсад – маҳаллалар миқёсида эҳтиёжманд аҳолининг иқтисодий имкониятларини кенгайтириш, хотин-қизларга тадбиркорлик фаолиятини йўлга қўйишда амалий ёрдам кўрсатишдан иборат эди. Шунингдек, бу борада маҳалла ўзини-ўзи бошқариш органлари ва жамоат ташкилотлари вакилларининг салоҳиятини ошириш кўзда тутилган эди.
Лойиҳа миллий миқёсда 2013 йилдан буён Ўзбекистон Хотин-қизлар қўмитаси амалий кўмагида республиканинг Тошкент шаҳри, Тошкент ва Сирдарё вилоятларидаги жами 5 та маҳаллада ҳаётга татбиқ этиб келинди.
Ижтимоий шериклик
Лойиҳа доирасида ҳудудларда ижтимоий шериклик асосида давлат ва нодавлат ташкилотларидан иборат Жамоатчилик гуруҳлари ташкил этилди. Бундай Жамоатчилик гуруҳлари ишида маҳаллий ҳокимият, ҳудудий Хотин-қизлар қўмиталари, «Микрокредитбанк» АТБ, Савдо-саноат палатаси, «Маҳалла» ҳайрия жамоат фонди, «Тадбиркор аёл» ва «Ҳунарманд» уюшмалари, «Камолот» ёшлар ижтимоий ҳаракати, Тадбиркорлик субъектларини рўйхатдан ўтказиш инспекцияси вакиллари фаоллик кўрсатди.Институционал ривожланиш
Лойиҳанинг дастлабки босқичларида нодавлат нотижорат ташкилотлар вакилларидан 30 нафар тренер ва мутахассис тайёрланди. Уларнинг ташкилот фаолиятини самарали бошқариш, инсон ресурсларидан оқилона фойдаланиш, ижтимоий маркетинг ва маблағларни жалб қилиш, тадбиркорлик фаолиятини ташкил этиш, ижтимоий тадбиркорлик ва ижтимоий шерикликни йўлга қўйиш бўйича билим ва кўникмалари оширилди.2014 йилнинг июль ойида 5 та маҳалла фуқаролар йиғини қошида аёллар ва ёшлар тадбиркорлигини қўллаб-қувватлашга йўналтирилган «Ахборот ойналари» ишга тушди.
Бунинг учун маҳалла ўзини ўзи бошқариш органларига компьютер жиҳозлари тақдим этилди ва интернет тармоғи уланди. Мамлакатимизда тадбиркорликни ривожлантиришга оид барча меъёрий-ҳуқуқий ҳужжатлар базаси шакллантирилди ва фойдаланиш учун топширилди.
Аҳолига амалий кўмак беришнинг янги шакли
Айни пайтгача «Ахборот ойна»лари томонидан тадбиркорлик асослари ва бизнесни режалаштириш мавзусида 27 та ўқув машғулоти ва маҳорат дарслари олиб борилди. Натижада 700 га яқин хотин-қизларга тадбиркорлик кўникмалари берилди.Ўқув семинарлар модулини ишлаб чиқиш ва учта семинар ташкил этишда лойиҳага Ўзбекистон Хотин-қизлар қўмитаси ҳамкори – ЮНЕСКО ишлари бўйича Миллий комиссия яқиндан ёрдам берди.
Шу қисқа муддат ичида «Ахборот ойна»лари тадбиркорликни ривожлантиришнинг ўзига хос майдонига айланиб улгурди: аҳоли бу ерга мурожаат қилиб, бизнес режа тузиш, тадбиркорлик субъектини рўйхатдан ўтказиш тартиби, тегишли молиявий, солиқ, микрокредитлаш масалалари бўйича қизиқтирган маълумот олиши, бизнесни бошқариш усулларини ўрганиши мумкин.
Кўрсатилаётган бундай бепул хизматлар нафақат танланган маҳаллаларда, балки қўшни маҳаллалар аҳолисида ҳам катта қизиқиш уйғотди.
Тижорат банклари билан ҳамкорлик туфайли, 137 нафар хотин-қиз, касб-ҳунар коллеж битирувчиларига ўз тадбиркорлик фаолиятини бошлаши учун жами 526,8 миллион сўм миқдорида имтиёзли микрокредитлар ажратилди.
Лойиҳа доирасида аёлларнинг ҳуқуқий, иқтисодий, молиявий билим даражаси оширилгани сари – уларнинг ўзига бўлган ишончи ортди, ўзининг вақтини ва оиласининг молиявий ресурсларини оқилона ва самарали тақсимлаш ва бошқаришни бошлади.
Лойиҳанинг натижалари Тошкент шаҳрида сарҳисоб қилинар экан, меҳмонлар мустаҳкамланган ҳамкорликни, бошланган хайрли ишлар давомини ҳамда уларнинг барқарорлигини таъминлаш йўлларини муҳокама этди.
Ҳамкорлик лойиҳаси яхши самара берди, шундай экан, бу каби лойиҳа ва дастурларни амалга оширишни давом эттириб, Ўзбекистон ва Европа Иттифоқи ташкилотлари ўртасидаги ҳамкорликни янада мустаҳкамлаш мумкин.
Реклама ҳуқуқи асосида
Изоҳ (0)