UzReport TV ЕЧЛ ўйинларини намойиш этиш ҳуқуқини неча пулга сотиб олганини сир сақлади

Жорий йилнинг 8 сентябрь куни Тошкентдаги Халқаро Бизнес марказида УЕФА Чемпионлар Лигаси мусобақасининг UzReport TV телеканали томонидан трансляцияси бошланишига бағишланган матбуот анжумани бўлиб ўтди.

Аввал хабар бериб ўтилганидек, UzReport TV телеканали УЕФА Чемпионлар Лигаси мусобақасини Ўзбекистон Республикаси ҳудудида тўғридан-тўғри трансляция қилиш ҳуқуқини берувчи лицензион пакетни харид қилган.

Ушбу пакет мусобақадан ўрин олган футбол учрашувларини, шунингдек, учрашувларнинг қизиқарли вазиятлари ва ўйинларга оид бошқа қизиқарли маълумотлар акс этган Highlights ва Magazines каби кўрсатувларни телевидение, Интернет тармоғи ва мобил алоқа тизими орқали трансляция қилишнинг эксклюзив ҳуқуқини ўз ичига олади.

Мазкур матбуот анжумани УЕФА Чемпионлар Лигаси ўйинларининг трансляцияси билан боғлиқ батафсил маълумотларни кенг оммага тақдим этиш ва футбол мухлислари томонидан шу мавзуда йўлланаётган кўплаб саволларга жавоб бериш мақсадида ташкил этилди.

Матбуот анжуманида УЕФА таркибига кирувчи футбол клубларининг эксклюзив тижорат агенти ҳисобланган «Team Marketing» (Швейцария) агентлиги, ҳамда «Saran Media International» (Мальта) компанияси вакиллари, шунингдек, UzReport TV телеканали масъул ходимлари ва оммавий ахборот воситалари ходимлари иштирок этди.

UzReport TV телеканали УЕФА Чемпионлар Лигаси футбол учрашувларини Ўзбекистон Республикаси ҳудудида трансляция қилиш ҳуқуқини расман қўлга киритган биринчи телеканалга айланди», — дея таъкидлаб ўтди «Team Marketing» агентлиги вакили Михаилс Стародубовс.

UzReport TV телеканали соғлом турмуш тарзини тарғиб қилиш ва телетомошабинлар орасида спортга бўлган қизқишни ошириш мақсадида жорий йилда спорт мавзусини янада ривожлантиришга қаратилган янги концепцияни тасдиқлади.

УЕФА Чемпионлар Лигаси учрашувларининг 2015/16 йилги тақвимига мувофиқ UzReport TV телеканали орқали ўйинларнинг тўғридан-тўғри трансляциялари 15 сентябрдан бошлаб амалга оширилади. Қайд этиш жоизки, телеканал юқорида келтирилган ҳуқуқларни учта мавсум учун сотиб олган бўлиб, яъни 2015/2016, 2016/2017, 2017/2018 мавсумларини қамраб олади.

UzReport TV трансляциялар ҳуқуқини қанчага сотиб олганини сир сақлади.

Европа Чемпионлар Лигаси ўйинларининг шарҳи рус ва ўзбек тилларида бўлиши матбуот анжуманида айтиб ўтилди. Учрашувларни ким шарҳлаши ҳозирча сир сақланмоқда ва телеканал футбол ихлосмандлари учун сюрприз қилмоқчи.