Жанубий Қозоғистон вилоятида дўстининг тўйида икки кишини отиб, ўлдириб қўйган шахс айбига иқрор бўлиб, полицияга таслим бўлди. Бу ҳақда «Today.kz» хабар бермоқда.
Хабар беришларича, 4 сентябрь куни Сайрам туманининг Манкент қишлоғидаги тўй маросимида куёвнинг дўстларидан бири, 19 ёшли шахс автомашина ичидан тўй кортежини олқишлаш учун ўқ отаман деб, эҳтиётсизлик оқибатида тепкини босиб юборган.
Натижада автомашина ҳайдовчисининг юзига жароҳат етказган, шунингдек, тўйни кутиб олишга чиққан ва машина яқинида бўлган 23 ва 26 ёшлардаги икки қўшни аёлни отиб қўйган. Оқибатда бу аёллар ўзига келмай, касалхонада вафот этган. Бундан ташқари, аёлларнинг ёнида бўлган, 2013 йилда туғилган болалар ҳам тан жароҳати олган.
Полиция маълумотларига кўра, кўрилган чоралар натижасида воқеа жойидан яширинган гумонланувчининг шахси аниқланган. Маълум вақт ўтиб гумонланувчи айбига иқрор бўлиб, полицияга ўзи келган. Ҳозирги вақтда мазкур ҳолат бўйича «қотиллик» моддаси билан жиноят иши қўзғатилган, «ўқотар» ҳибсда сақланмоқда.
Изоҳ (0)