ЖЧ—2018 саралаш босқичи доирасидаги 3 сентябрь куни ўтказилган Ўзбекистон — Яман ўйинидан кейин «Uff.uz» сайти миллий терманинг кейинги имкониятларини чамалаб чиқди.
«Кеча ғалаба қозондик. Уч очко чўнтагимизда. Гўёки, ҳар қандай танқидни ортга суриб турсак бўлади. Аммо, шуни айтишимиз керакки, 1:0 ҳисобидаги ғалаба бизга деярли ҳеч нарса бермади. Йирикроқ ҳисоб керак эди бизга.
2-саралашда саккизта гуруҳ бор. ЖЧ—2018’нинг 3-саралаш босқичига саккизта гуруҳдан 12 та терма чиқади, 16 та эмас.
Демак, гуруҳда иккинчи ўринни олган терма ҳам ўз гуруҳида қолиб кетиши мумкин. Яъни, 3-саралаш босқичига гуруҳ ғолиблари ва энг яхши кўрсаткичга эга бўлган тўртта терма йўл олади.
‘А’ гуруҳида БАА ва Саудия Арабистони якунда тахминан бир хил очкога эга бўлади. ‘C’ гуруҳида Гонконг, Хитой ва Қатарлар ҳам деярли бир хил очко йиғади. Ҳар ҳолда, ҳозир вазият шунақа. ‘D’ гуруҳида Эрон ва Уммон яхшигина очко йиғади. ‘E’ гуруҳидаги Япония ва Сурияларнинг имкониятлари ҳақида гапирмасак ҳам бўлади. Бундан ташқари, ‘G’ гуруҳида Кувайт ва Жанубий Корея ҳам шулар жумласидан.
Хуллас, бизнинг гуруҳда иккинчи ўрин эгаси 3-саралашга чиқа олмаслиги мумкин. Тўғри, бу бир тахмин. Лекин жудаям қалтис тахмин. Ҳозирги вазиятимиз шуни тақозо этмоқда. Кечаги ўйин билан Ўзбекистон термаси Филиппинни сафарда ютиш эҳтимоли 50/50.
Агар 8 сентябрь куни Манилада очко йўқотсак ва КХДР термаси кетма-кет ўз уйида икки марта ютса, биз 3-саралашга чиқа олмаслигимиз мумкин. Ҳар ҳолда шундай эҳтимол бор. КХДР кеча Баҳрайнни сафарда ютиб келди. Демак, Ўзбекистонни ютгани ҳам бежиз эмас экан. Гуруҳимиз фаворити — шубҳасиз КХДР. Қизиғи шундаки, мазкур терма жамоа навбатдаги икки ўйинни ўз уйида Филиппин (8 октябрь) ва Яманга (13 октябрь) қарши ўтказади. Олти очко ола билмайди, деб ўйлайсизми? Бемалол олади! Улардаги тартиб ва интизом ҳақида ортиқча гапирмасак ҳам бўлади.
Ана шундан кейин Ўзбекистон амалда КХДРга етиши қийин бўлади, гарчи назарий имконият бўлса-да. Боз устига Ўзбекистон очко йўқотса, Филиппинда ҳам очко кўпайиб кетади. Уёғи энди арифметика.
Авваллари 4-саралаш босқичи ва плей-оффгача бемалол етиб борар эдик. Энди бўлса, Ўзбекистон 3-босқичга ҳам чиқа олмаслиги мумкин. Бугун хулоса қилмасак кеч бўлади. Филиппинни албатта ютишимиз керак!», — дейилади мақолада.
Изоҳ (0)