Таиланд пойтахти Бангкок шаҳрида бокс бўйича катталар ўртасида Осиё чемпионати ўзининг қизғин палласига кирди. Қитъанинг етакчи чарм қўлқоп усталари иштирокида ўтаётган мазкур йирик мусобақада Ўзбекистон шарафини тўлиқ таркибдаги боксчилар ҳимоя қилишади. Бу ҳақда «Olamsport.com» хабар беради.
2 сентябрь куни ўтказилган баҳслардан сўнг, бир йўла саккиз нафар боксчи ярим финал йўлланмасини қўлга киритди. 60 килограмм вазн тоифасида иштирок этаётган Элнур Абдураимов эронлик Форутан Голарни мағлубиятга учратди. Энг оғир вазн (+91 кг) тоифасидаги боксчи, бунга қадар Германия, Қирғизистон, Беларусда ўтказилган халқаро турнирлар ғолиби Баҳодир Жалолов эса қозоғистонлик Иван Дичкога имкониятни бой бериб қўйди.
Ўзбекистон терма жамоасининг энг тажрибали боксчиси Элшод Расулов (81 кг) қирғизистонлик Эркин Адилбек улу, Шаҳобиддин Зоиров (52 кг) ҳиндистонлик Мадан Лалга ҳеч қандай имконият қолдирмади. Шу тариқа, саккиз нафар боксчи Осиё чемпионатининг ярим финалига йўлланма олди. Бу саккизта медаль деганидир.
Изоҳ (0)