Тошкент шаҳрида газда ҳаракатланувчи MAN автобуси синови якунига етди. «Tashtrans.uz» хабарига кўра, янги автобус Мустақиллик байрами арафасида 44-йўналиш бўйлаб йўловчиларга хизмат кўрсатишни бошлаган.
Автобус салонида жами ўриндиқлар сони 28 дона бўлиб, улар жуда юмшоқ ва қулай. «Автобуснинг орқа қисмидаги зина биринчи навбатда туриб кетаётган йўловчиларга маълум бир ноқулайлик туғдириши мумкин бўлган ягона камчиликдир», — дейилади сайт хабарида.
Салоннинг олд қисми тошкентлик йўловчилар ўрганиб қолган Mercedes-Benz Conecto Low Floor автобусларидан бироз фарқ қилади, хусусан, чап томонда жойлашган ўриндиқларни, йўловчилар сони кўпайиб кетган вақтда, йиғиб қўйиш мумкин.
Автобус салонидаги олд ғилдиракларнинг бўртиб чиққан қисми кичик шкафча кўринишида ишланган. «Бу шкафчалар техник асбоб-ускуналарни жойлаштириш учун мўлжалланган, бизнинг йўловчилар эса ундан қўл юкини қўйиш учун фойдаланса ажаб эмас», — деб ёзади Tashtrans.uz.
«Автобуснинг яна бир жиддий камчилиги — дарчалар анча кичик ва ингичка, бу эса салондаги вентилациянинг нормал кечишига халал беради. Шу сабабли жазирама кунларда тиқилинч салонда нафас олиш бироз қийин бўлиши мумкин», — дея қўшимча қилинади сайт хабарида.
«Умуман олганда, автобусдан олинган яхши таассурот топилган камчиликлардан анча катта ва, умид қиламизки, янги MAN автобуси бизнинг йўлларимизга мослашиб, ‘ўзидан кўпайиб кетади’», — дейилади Tashtrans.uz хабарида.
Изоҳ (0)