15 ёшли ўсмир АҚШ президентлигига номзодини қўймоқчи

АҚШнинг Айова штатида яшовчи 15 ёшли Брэди Олсон Федерал сайлов комиссияси сайтида Диз Натс (Deez Nuts) номи билан АҚШ президентлигига номзод сифатида рўйхатдан ўтди, деб хабар бермоқда New York Post.

Унинг сўзларига кўра, кейинги қадам — партия топиш бўлади, масалан, Миннесота мустақиллик партияси ёки «Замонавий виглар». Шунингдек, вице-президентни танлаш муҳимлигини, масалан, МакКаббинс танланса, бюллетенда «Нац/МакКаббинс» ёзуви яхши кўринишини маълум қилган.

Шунингдек, Федерал сайлов комиссияси сайтида Президент Император Цезарь, Жек Читтак каби номлар билан номзодлар рўйхатдан ўтган. Лимбербат МакКаббинс эса 18 ёшли қизнинг мушуги бўлиб, унинг дўсти томонидан номзоди таклиф этилган.

Комиссия сайтидаги зарур ҳужжатни исталган киши тўлдириши мумкин. Ҳазиломуз аризалар уларга 5000 доллардан ортиқ хайрия қилингач муаммога дуч келади — шунда қўшимча текширув ўтказилади ва бундай номзодлар текширувдан ўтолмайди. АҚШ қонунчилигига биноан, фақатгина 35 ёшдан ошган фуқарогина президент бўлиши мумкин.