Рублнинг долларга нисбатан кескин қадрсизлангани сабаб, россиялик мусулмонлар 2015 йилда Саудия Арабистонидаги муқаддас қадамжоларни зиёрат қилишдан воз кечмоқда. Бу ҳақда Россия муфтийлар кенгаши раиси ўринбосари Рушан Аббосовга асосланиб, «ТАСС» хабар бермоқда.
«Квотани ҳозирча фақат Қрим тўлдирди — у ердан 300 дан ортиқ киши зиёратга боради, бошқа ҳудудларда эса квоталар ҳали тўлмаган. Ҳатто зиёратчилари сони ҳар доим энг кўп бўладиган Доғистон ҳам квотани ёпа олганича йўқ», — деди Аббосов.
Унинг сўзларига кўра, зиёрат қиймати тахминан 3,5 минг долларга тенг, бироқ Қрим фуқаролари учун имтиёз бор — сафар харажатларининг 30 фоизини Қрим республикаси ҳукумати тўлаб беради.
Аббосовнинг қайд этишича, бу йил Ҳаж зиёратига борадиган россияликлар сони 16,4 мингдан камроқ бўлади, чунки Саудия Арабистони Россияга айнан шунча ўрин тақдим этган. Аббосовнинг айтишича, квоталар миқдори ҳудудлар ўртасида қайта тақсимланиши мумкин, бироқ бу борада якуний қарор ҳозирча қабул қилинмаган.
Бу йилги зиёратнинг россияликлар учун яна бир ноқулай томони, 2015 йилдан бошлаб Саудия Арабистонига кириш учун ҳар бир кишида биометрик паспорт бўлиши керак. Шу сабабли ҳам баъзи ҳудудларда квота сони қисқартирилган.
Изоҳ (0)